(کابل ټکی کام، ۱۳۹۸، وری ۱۰)
د زابل ولايت په شهرصفا ولسوالۍ پولیسو د خپلې پوستې پر نورو پوليس ملګرو بريد کړی او د اتو عسکرو له وژل کيدو وروسته خپله له طالبانو سره يوځای شوي دي.
پيښه د يادې ولسوالۍ مربوط د خادو په نوم پوسته کې رامنځته شوې ده.
طالبانو کابل ټکی کام ته په راليږلې خبرپاڼه کې ويلي، بريدګر اووه تنه دي او د دولت په نظامي ليکو کې د دوی نفوذي کسان و چې په پوسته کې يې خپل نور اته عسکر ملګري وژلي او يو بل عسکر يې ژوندی نيولی دی.
خبرپاڼه کې راغلي، له بريد وروسته (نفوذي مجاهدینو) د پوستې نوولس ميله وسلې او مهمات طالبانو ته وروړي دي.
سيمه ييزې امنيتي سرچینې وايي، تاييدوي چې په ياده پيښه کې یو شمير پوليس وژل شوي او ځينې نور لادرکه دي.
خو تر اوسه د دغه ولايت امنيتي مسؤولينو په دې تړاو څه نه دي ويلي.
دا په داسې حال کې ده، چې وړمه ورځ هم د هلمند په ګرشک ولسوالۍ کې د طالبانو دوو نفوذي بریدګرو د خپلې پوستې اووه پوليس ووژل او خپله له طالبانو سره یوځای شوی.
طالبانو په خپلو اعلاميو کې ويلي چې د دولت په ليکو کې لسګونه نفوذي کسان لري او له موقع په استفادې به په بهرنيو او دولتي عسکرو او چارواکو بريدونه کوي.
تر دې مخکې هم ډير کرته ورته ډول پيښې رامنځته شوي چې سلګونه بهرنيو او دولتي عسکرو- چارواکو ته پکې مرګ ژوبله اوښتې ده.
ورته ډول بريدونو د دولتي ځواکونو او بهرنيانو تر منځ باور کم کړی او په وروستيو کې خلک زړه نه ښه کوي چې په پوځ کې ځانونه ورګډ کړي.
