(کابل ټکی کام، ۱۳۹۸، وری ۱۰)
د بغلان اوسيدونکي وايي، دولتي ځواکونو يې ښوونځي تړلي او د هغوی له خوا پکې پوځي مرکزونه او مورچې جوړې شوي دي.
دوی وايي، له ښوونځيو يې دولتي عسکر ګټه اخلي او اوس يې په جګړې په لومړۍ کرښه بدل کړي دي.
د بغلان خلک وايي، د دولتي ځواکونو او د جګړو له ويرې يې په مرکزي بغلان، ډنډغوري، او بورکې ولسواليو کې لسګونه ښوونځي تړل شوي او زده کوونکي خپلو ښوونځو ته نه شي تللی.
د دغه ولايت د پوهنې رئيس سيد اسماعيل مجاهد هم ياده ستونزه مني وايي، په دې تړاو يې له امنيتي ادارو سره خپلې انديښنې شريکې کړي خو په وينا يې په بيا بيا غوښتنو يې لا هم ورته مثبت ځواب نه دی ويلی.
په عين حال کې د بغلان والي عبدالحی نعمتي هم مني چې په ښوونځيو کې دولتي ځواکونه ديره شوي زياتوي که دغه ځواکونه له ښوونځيو ووځي نو د طالبانو لاسونو ته به ولويږي.
خو ډير کله دولتي ځواکونه په دغه ښوونځيو، کلينيکونو او ورته ډول نورو عام المنفعه ځايونو کې پوځي مراکز جوړوي او له دغه مرکزونو پر طالبانو بريدونه کوي.
که څه هم طالبان تر خپل حاکميت لاندې سيمو کې ښوونځي، مدرسې او مکتبونه فعال ساتي او وخت پر وخت يې د هغوی د تعليم او تربيې مسؤولين څارنه کوي خو ځينې وخت داسې ښوونځي چې دولتي ځواکونو پکې سنګر نيولی وي د بريدونو لاندې راځي چې دولتي رسنۍ بيا د طالبانو پرضد ترې په تبليغاتو کې استفاده کوي.
