کابل ټکی کام ( دوشنبه، ۱۲ وری، ۱۳۹۸ ل)
د اتلس کلنې جګړې د سياسي حل لپاره د امريکا د بهرنيو چارو وزارت ځانګړی استازی زلمی خليلزاد نن کابل ته رارسېدلی دی.
زلمي خليلزاد څو شيبې وړاندې په خپله ټوېټر پاڼه وليکل چې کابل ته له رارسېدو ورسته يې د سولې د عالي شورا د دارالانشاء له رئيس عمر داودزي په ګډون د سولې په اړه د کابل د حکومت له مرکچي پلاوي سره هم ليدلي دي.
ټاکل شوې ده چې خليلزاد په کابل کې د ګډ حکومت له مشرانو سره هم لیده کاته وکړي او د افغانستان د سولې په اړه ورسره خبرې وکړي خو دا هم لا مالومه نه ده چې نوموړی به د افغانستان د ملي امنيت سلاکارحمدالله محب سره وګوري او که نه.
د ملي امنيت له سلاکار حمدالله محب سره د امريکايي چارواکو اړيکې وروسته له هغه ترينګلې شوې چې هغه تيره مياشت په زلمي خليلزاد نيوکې وکړې چې نوموړی په افغانستان کې د واک د ترلاسه کولو په هڅه کې دی.
ويل کیږي چې امريکا له اشرف غني څخه غوښتي چې محب له خپلې دندې ګوښه کړي خو غني د نوموړي د ګوښه کېدو له پاره د زلمي خليلزاد ګوښه کولو شرط ايښی دی.
د اجراييه رياست وياند فريدون خوځون هم کابل ته د زلمي خليلزاد راتګ تاييد کړی دی او ويلي يې دي چې نوموړی به له ډاکټر عبدالله عبدالله سره هم وګوري او د افغانستان د سولې په تړاو به له یو بل سره خپل نظريات شريک کړي.
زلمي خليلزاد د افغانستان د سولې په تړاو دا شپږم سفر د تيرې مارچ مياشتې په ۲۵ نېټه پيل کړ چې په کې به نوموړی د افغانستان او قطر په ګډون د سيمې او نړۍ اووه هيوادونو ته سفرونه کوي.
ټاکل شوې ده چې نوموړی به د پاکستان، ازبکستان، بلجيم، اردن او بريتانيې هيوادونو څخه هم ليدنه وکړي او ددې هيوادونو له مشرانو سره به په افغان سوله خبرې کوي.
زلمی خليلزاد په داسې حال کې افغانستان ته سفر کوي چې ټاکل شوې ده د روانې ميلادي مياشتې په پنځلسمه نېټه په قطر کې د سولې په تړاو د مسکو په څېر بين الافغاني غونډه جوړه شي.
اودغې غونډې ته دطالبانو لخوا بعض پخواني او اوسني سیاسي اشخاص دعوت شوي، دڅارونکو په باور؛ امریکا دافغانستان دجګړې په ختمېدا، او دخپلو ځواکونو په ویستلو کې جدي ښکاري، نوځکه یې ددغې قضیې دحل لپاره باصلاحیته پلاوی سره له اختیاراتو راولېږه څو دې اتلس کلنې جګړې ته یوسیاسي حل پیداکړي.
