کابل ټکی کام ( دوشنبه، ۱۲ وری، ۱۳۹۸ ل)
په قطر کې د طالبانو دسیاسي دفتر ویاند وایي، له افغانستان څخه د بهرنیو ځواکونو وتل کولی شي د خپلمنځي ستونزو حل ته چاپیریال برابر کړي. پاک ټربیون د طالبانو د سیاسي دفتر د ویاند سهیل شاهین له قوله لیکلي، کله چې بهرني ځواکونو له افغانستانه ووځي د نورو مسایلو حل کول دومره ستونزمن کار نه دی. سرچینه کاږي شاهین د یوې پوښتنې په ځواب کې ویلي، دوی په تېرو دورو کې له امریکایي لوري سره ګټورې خبرې کړې دي او په راتلونکي پړاو کې به پر اوربند، له افغانستانه د بهرنیو ځواکونو پر وتلو او له کابل ادارې سره د مذاکراتو پر پیلولو یوې نتیجې ته ورسېږي. نوموړي زیاته کړې دوی تمه لري چې په راتلونکي پړاو خبرو کې به یوې هوکړې ته سره ورسېږي او دا هوکړه به له افغانستان د بهرنیو ځواکونو د وتلو نیټه هم مشخصه کړي. هغه ددې پوښتنې په ځواب کې چې ایا افغان حکومت د دې پروسې ګډوډولو هڅه کوي وویل، دوی حکومت ته د یوې ډلې په سترګه ګوري او هغوی ددې پروسې د ګډوډولو واک او وړتیا نه لري.
دیادونې وړ ده چې په راتلونکو څو ورځو کې به په قطر هېواد کې دوه غونډې تر سره شي، یوه ناسته به بین الافغاني، اودوهمه ناسته به له امریکايي مذاکراتي ټیم سره وي، اودې ناستې ته هیلې، اوامیدونه ډېر دي چې شاید لاسته راوړنې به هم ولري.
