انجنیر عمیر ویاړ
د محب خبره ورو ورو د غښتلتیا جامې اغوندي، تیره ورځ خلیلزاد په ارګ کې له پخواني جهادي رهبرانو (خو فعلا له جهاد نه منحرفو مشرانو) سره ناسته درلوده، هر منحرف جهادي مشر د سولې په اړه خپل نظر وړاندې کاوه، چې ځینو پکې د سولې روانه پروسه یوه لوبه وګڼله، او د روانې سولې کلک مخالفت یې وکړ.
په عکس العمل کې د امریکا وایس سرای صیب خلیلزاد سخته غوصه څرګنده کړه، او پر جهادی او سیاسي رهبرانو یې داسې پټکه وکړه لکه یو ښوونکی یې چې د ښوونځي پر کوچنیو زده کوونکو کوي، منحرف جهادی رهبران یې هک حیران کړل او وازه خوله پاتې شول، وایس سرای صیب د خپلې له غوصې ډکو خبرو په جریان کې وویل چې تاسې هغه څوک یاست چې پخپله د عیش او عشرت په ژوند بوخت یاست نه درنه جنګ څوک وژلی او نه یې ټپی او معلول کړی، تاسې ځکه د سولې مخالفت کوئ او سوله درته لوبه ښکاري، او زیاته یې کړه چې سوله د افغانانو اشده اړتیا ده او امریکا هم په خپل تصمیم کې جدیت لري، او هرو مرو غواړې جګړه پای ته ورسیږي او بهرني فوځیان له افغانستانه ووځي.
په دې وخت کې جهادی منحرفو رهبرانو یو بل ته په حیرانتیا سره وکتل او هیڅ ډول ځواب یې نه ردلود، او زیات دې ته حیران شول چې دا خو سمه ده چې یوه غونډه ده او میټنګ دی نو دې پټکې او غوصې ته پکې څه اړتیا وه، ایا مونږ رښتیا هم غلامان او تالي څټي یو او هسې ځان تیرباسو چې پخواني جهادي او سیاسي رهبران یو.
په یاده غونډه کې پروفیسور عبدالرب رسول سیاف، انجنیر ګلبدین حکمتیار، د ولسمشر معاون دانش، کریم خلیلی، محقق او نور ناست وو، خو یوه هم منطقی او معقول ځواب نه درلود، دا حالت د ابوبکر صدیق رضي الله عنه د هغې وینا مصداق دی چې فرمایلي یې دي: هیڅ یوه قوم جهاد نه دی پریښی مګر خدای تعالی ذلیل کړي دي. او دا خو لا د ذلت پیل دی وروسته نور ذلت یې ګورئ.
