کابل ټکی کام ( چهار شنبه، ۲۱ وری، ۱۳۹۸ل)
وروسته ترهغې چې د امریکا ولسمشر ډونالډ ټرمپ د ایران سپاه پاسداران ځواک د ترهګرو ډلو په لیست کې شامل کړ، یاد ځواک په یوه اعلامیه کې ویلي چې امریکا ته به ددې تېري، نه هېرېدونکی، تاریخي درس ورکړي. د سپاه پاسداران په اعلامیه کې چې ایراني رسنیو ته استول شوې راغلي، ایران له ټولو هغو کورنيو او باندنیو بنسټونو او اشخاصو مننه کوي چې د امریکا ددې اقدام پر وړاندې یې د دوی ملاتړ کړی دی. سرچینه وړاندې کاږي چې ایران د امریکا په څېر د یو تېري کوونکي هېواد پر وړاندې خپله مبارزه روانه ساتلې ده او یاد هېواد به هیڅکله په ورته ګامونو خپلو موخو ته ونه رسېږي. د سرچینې په خبره ایران به امریکا ته د دې اقدام داسې درس ورکړي چې خپله به پښېمانه شي.
یادونه باید وکړو چې امریکا دایران سپاه پاسداران ځواک دوه ورځې وړاندې دترهګرو ډلو په لیست کې داخل کړ، تردې وړاندې هم دایران اوامریکا اړینکې سمې نه وې، خو اوس لا پسې خرابې شوې، ایران هغه هېواد دی چې همېش یې دامریکا انتقادونه په کلکو اخطارونو جواب کړي.
