سوډان: عمرالبشیرله واک څخه ګوښه ګړای شو
کابل ټکی کام ( پنجشنبه، ۲۲ وری، ۱۳۹۸ل)
په سوډان کې پوځ نن د سهار په څوساعتونو کې لومړی د دولتي رادیو تلویزیون ودانۍ ونیوله او وروسته يي د ولسمشرۍ ماڼۍ محاصره کړه.
د سوډان په پلازمینه خرطوم کې په ټولو مهمو واټونو او سړکونو کې پوځیان ځای په ځای شوي دي، هیچاته دګرځېدو اجازه نه ورکوي.
ویل کیږي د سوډان ولسمشر عمر البشیر له خپلې دندې استعفا کړې ده او هغه په کور کې نظر بند ده.
د سوډان پوځ په هیواد کې د واکمن ګوند د چارواکو په نیولو پيل کړی دی. پوځ تر اوسه پورې تر سلو ډیر سیاسیون نیولي دي، اولاهم دالړۍ دوام لري.
پوځ د عمر البشیر لومړی مرستیال ، د دفاع وزیر او د عمر البشیر ساتونکي هم نیولي دي. د خرطوم هوايي ډګر د هوايي ټرافیک پر مخ تړل شوی دی. د ولسمشرۍ ماڼۍ محاصره ده او هیچا ته د وتو او ننوتو اجازه نه ورکول کیږي.
عمر البشیر د تیرو ۳۰ کلونو راهیسې د سوډان مشرۍ په غاړه درلوده چې د پوځ لخوا له دندې ګوښه کړای شو.
