امین وردګ
هغه بله شپه چې د هلمند ولایت د نادعلي ولسوالۍ په اړونده سیمه کې د اشرف غني ظالمو پوځیانو (د غربي ښکېلاکګرو په مټ او مرستې سره)- کوم وحشت وکړ؛ د بښنې وړ نه دی.
دوی نه یوازې دا چې د یوه معالج په کور نیمه شپه چاپه ووهله، په هغوی یې ماتم جوړ کړ او کور یې د همغوی په وینو ورته رنګ کړ – بلکې دوې تور سرې یې هم لاستړلې له ځانونو سره بېولې دي؛ چې د اشرف غني او غربي ملګرو یې دا ناوړه او ناروا عمل قطً نامردي او په بشري حقوقو ښکاره ګذار دی.
افغانان ټولې نړۍ پېژندلي چې له نوامیسو څخه په دفاع کې ساری او سیال نه لري.
سترګې د هغه چا پرې راباسي چې د دوی دروازې (عزت ، عفت او نوامیسو) ته یې نیولې وي.
افغان مسلمانان هر څه زغملای شي! خو په مقدساتو او نوامیسو یې تېری تر مرګ په لس واره ورته ګران دی.
افغانان ګیلمن نه دي او پوهیږي چې حریف یې نامرده دی! له نامردو او ناځوانو لښکرو سره بلد دي؛ ځکه چې دلته پخوا هم پیرنګي او روسي تاړاکونه تېر شوي ؛ نو همدا لامل دی چې د نامردو جګړه مارو عادتونه او خواص تر نورو ټولنو افغانان ښه پېژني؛ د دوی لوټمار جنګیالي چې کله په معرکو کې وارخطا شي، بیا نو ارو مرو دارنګ کرغېړنو او بې غیرتو کارونو ته لاس اچوي.
اصل مطلب ته راځو … د دغې پېښې تر شا د چا-چا کرغېړن لاسونه دي؟
په دغه حساس وخت کې (چې له یوې خوا د سولې خبرې د بریا په درشل ولاړې دي، له بلې خوا بیا د افغانستان د آزادۍ او د غربیانو د ماتې آوازې بیخي تودې شوې) د اشرف غني خوروړي او وینه ځبېښونکي ځناور د افغانانو نوامیسو ته په ډېره بې شرمۍ سره لاسونه اوږدوي.
مانا یې دا ده: داسې چټله کړنه یوازې هغه قشر تر سره کوي، کوم چې د سولې مخالف ؤ، مخالف دی او مخالف به وي ؛ ددغې وحشي طبقې ګټه په جګړو کې نغښتې او لاسي غواړي چې د جګړې میدان ګرم وساتي.
د دوی موخه همدا ده چې په دغه او دغو ته ورته خیرنو اعمالو سره؛ هم د طالب ځواکونو احساسات را وپاروي او هم د عامو افغانانو ؛ تر څو په دغه ډول د سولې مخه ډب کړي.
دوی غواړي چې د ملت د احساساتو له امله پر طالبانو زور وروړي تر څو له امریکایانو سره مقاطعه اعلان کړي او د خبرو پر ځای بېرته جګړو ته مخه کړي.
پخوا به خلکو د اشرف غني په ځیرکتوب او سیاسي بصیرت اعتراف کولو، مګر نن ډېری افغانان پوه شوي چې اشرف غني نه ځیرک دی او نه هم سم سیاسي بصیرت لري ځکه چې د یوه ولسمشر لپاره (هغه هم په حساسو پړاوونو کې) د خپل رعیت پر وړاندې داسې بې شرمي یوازې د هغه په ناپوهۍ او جنون دلالت کوي.
