(کابل ټکی کام، ۱۳۹۸، وری ۲۵)
طالبانو د تيرې جمعې په ورځ د الفتح په نوم خپل پسرلني عمليات اعلان کړل چې د هيواد په زياتره ولايتونو کې يې په پوستو، قرارګاوو، د بهرنيو ځواکونو په مرکزونو او دولتي تأسيساتو بريدونه پيل کړي دي.
د شنبې په ورځ طالبانو پر کندز ښار او شاوخوا ولسواليو بريدونه وکړل چې له کبله يې پنځه پوستې د طالبانو لاسته لويدلي دي.
د کندز د پوليسو وياند انعام الدين رحماني پرون ناوخته وويل، چې د کندز ښار په څنډو کې د طالبانو او دولتي ځواکونو تر منځ نښتې رانې دي.
امنيتي سرچينې وايي، د طالبانو بريدونو کې پوليسو ته درنه مرګ ژوبله اوښتې خو ولايتي چارواکي يې په اړه له معلوماتو ورکولو ډډه کوي.
د دغه ولايت د حوزوي روغتون مشر احمد نعيم منګل وايي، چې د دغه نښتو له کبله شاوخوا پنځوس زخميان روغتونونو ته وړل شوي دي.
طالبان وايي، د کندز مرکز، چهاردرې، خان اباد او ګل تپې ولسواليو په مربوطاتو کې يې له دولتي ځواکونو پنځه پوستې نيولي او عسکرو ته يې درنه مرګ ژوبله اړولې ده.
طالب وياند ذبیح الله مجاهد تازه په خپله رسمي ټویټر پاڼه ليکي، د کندز په جګړه کې درې شپيته عسکر او پوليس وژل شوي، دوه پنځوس نور ټپيان او دوه تنه طالبانو ژوندي نيولي دي.
مجاهد د پنځو طالبانو د ټپي کيدو خبر ورکړی زياتوي د جګړو په ترڅ کې په زياته اندازه وسلې، وسایط او مهمات هم د طالبانو لاسته ورغلي دي.
طالبانو پرون وويل، چې د الفتح عملياتو دوهمه ورځ يې پر بګرام هوايي ډګر له توغنديز بريده پيل او د ورځې تر اخره پورې يې په ټول هيواد کې ۱۰۵ بريدونه کړي چې ۲۲۳ عسکر، پوليس او اربکيان پکې وژل شوي، ۱۰۶ ټپيان او درې تنه يې ژوندي نيول شوي، لس تسليم شوي دي.
دغه راز طالبانو پرون د کندهار د دامان ولسوالۍ په مربوطاتو کې د بهرنيانو پر يوه ټانګ د ماين چاودنه وکړه چې په ترڅ کې يې د طالبانو په وينا دوه عسکر وژل شوي او دوه تنه ټپيان دي.
خو په افغانستان کې ميشت بهرنيو ځواکونو په يوې خبرپاڼه کې ويلي، چې چاودنه په رومانيايي عسکرو شوې او څلور تنه پکې ټپيان شوي دي.
