(کابل ټکی کام، ۱۳۹۸، وری ۲۵)
پاکستانۍ رسنۍ وايي، په دغه هيواد کې ځينو چينايي قاچاقبرانو په غير قانونه ډول مرکزونه فعالی کړي او پاکستانيو ښځو سره د واده په پلمه د چينايي وګړو ودونه کوي.
خبر زياتوي، چينايي وګړي پاکستانۍ ښځې چين ته وړي او هلته يې په جنسي کاروبار مجبوروي او يا يې له وژلو وروسته د بدن اندامونه پلوري.
له تيرو څو ورځو راهيسې په پاکستانيو رسنيو کې دغه راپورونه ورکول کيږي خو تازه د چين سفارت په دې اړه غبرګون ښودلی دی.
په پاکستان کې د چين سفارت ويلي، د چين په قانون کې دغه ډول کاروبار سخت جرم بلل کيږي او هڅه به وکړي چې د پاکستانيو چارواکو سره په ګډه د دغه جرم مخه ونيسي.
له ډيرو کلونو راهيسې د پاکستان او چين حکومتونو تر منځ دوستي شته چې ډيری چينايي وګړي دغه هيواد ته سفر کوي.
د پاکستانيو او چينايي وګړو تر منځ د ودونو راپورونو تر دې مخکې هم ورکول شوي خو تازه د پاکستان د پارلمان غړو هم د دغه ډول ودونو د مخنيوي لپاره بحثونه پيل کړي دي.
