بلخ: د مزارشريف د هوايي ډګر د استخباراتو مدير وژل شوی
(کابل ټکی کام، ۱۳۹۸، وری ۲۵)
د بلخ امنيتي مسؤولين وايي، چې د مزارشريف د هوايي ډګر د استخباراتو مدير د طالبانو په بريد کې وژل شوی دی.
د بلخ د امنيې قوماندانۍ وياند عادل شاه عادل وايي، د هوايي ډګر د استخباراتو مدير احمد خالد پرون ناوخته د سمنګان- بغلان پر لويه لاره په چشمه شير سيمه کې د طالبانو په کمين کې ووژل شو.
نوموړی وايي، احمد خالد د خپلې کورنۍ له غړو سره کابل ته روان و چې طالبانو ورته د موټر درولو ويلي خو نوموړي موټر نه دی درولی او د شاه له خوا په ډزو لګيدلی دی.
د عادل په وينا، په دغه بريد کې د هغه د کورنۍ نورو غړو ته زيان نه دی اوښتی او یوازې د استخباراتو مدير پکې وژل شوی دی.
طالبانو تر اوسه په دې اړه څه نه دي ويلي.
طالبانو له تيرو دوو ورځو راهيسې د الفتح په نوم پسرلني عمليات پيل کړي چې د هيواد ډیری لويې لارې يې د دولتي چارواکو، او نظامي کسانو پر مخ تړلي او په نظامي قرارګاوو يې بريدونو ته زور ورکړی دی.
