بدخشان: جرم ولسوالۍ کې طالبانو اووه پوستې نيولي
(کابل ټکی کام، ۱۳۹۸، وری ۲۵)
د بدخشان ولايت په جرم ولسوالۍ کې طالبانو په دولتي پوستو بريدونه کړي چې لسګونه عسکرو ته پکې مرګ ژوبله اوښتې او ځينې پوستې د طالبانو لاسته لويدلي دي.
د بدخشان امنيتي چارواکي وايي، تيره شپه طالبانو د یادې ولسوالۍ په مربوطاتو کې په دولتي پوستو بريدونه کړي خو تر اوسه د تلفاتو په کره معلومات نه لري.
طالبانو کابل ټکی کام ته په راليږلې خبرپاڼه کې ويلي، د يادې ولسوالۍ په یباب او سوچ سيمو کې تيره شپه په پوستو بريدونه کړي چې تر سهاره يې دوام درلود زياتوي د دغه بريدونو په پايله کې اووه پوستې طالبانو نيولي، پنځه څلويښت عسکر وژل شوي او لسګونه نور ټپيان دي.
طالبانو په دغه نښتو کې د خپلو دوو کسانو د وژل کيدو او څو نورو د ټپي کيدو خبر هم ورکړی دی.
دغه راز خبرپاڼه کې راغلي، چې د بريد په پايله کې په زياته اندازه وسلې، مهمات او جنګي توکي هم د طالبانو لاسته ورغلي دي.
طالبانو د تيرې جمعې په ورځ د الفتح په نوم پسرلني عمليات پيل کړل چې د هيواد په زياتره ولايتونو کې په نظامي قرارګاوو، پوستو او دولتي تأسيساتو بريدونه يې لا هم دوام لري.
