(کابل ټکی کام، ۱۳۹۸، وری ۲۶)
د افغانستان د اسلامي حزب مشر ګلبدين حکمتيار وايي، له حکومت سره يې د سولې معاهده په خپل لاس ليکلې او ټول شرايط يې مراعات شوي خو په وينا يې د دغه تړون پنځه نوي سلنه شرايط يې نه دي عملي شوي.
نوموړی وايي، جنګ يې د افغان اولس او هيواد په ګټه نه و، له سنګره يې په کابل کې پاتې کېدل بهتره و ځکه يې له جګړې لاس واخيست او کابل ته راغلی.
زياتوي: “متأسفانه د معاهدې د بندونو په سلو کې پنځه نوي يې نه دي عملي شوي، ګام ګام کې د معاهدې مخالفت شوی دی”.
نوموړی وايي، په معاهده کې راغلي و چې دوه مياشتو کې به يې ټول بنديان خوشې شي خو زياتوي دوه کاله تيريږي چې په ګڼ شمير بنديان يې لا هم په زندانونو کې دي، ټول وسله وال او ملکي پرسونل به په امنيتي لیکو او دولت کې مدغم شي خو تر اوسه يو فرد هم پکې نه دی مدغم شوی.
نوموړي د دې پوښتنې په ځواب کې چې په سوله کې يې څومره ګټه کړې وايي، (دا چې زه نن په کابل کې یم دا کافي ده) او کابل کې به خپل حضور قانع او راضي یم.
ګلبدين حکمتيار د ۲۰۱۶م کال په ستمبر مياشت کې د ګډ حکومت سره د سولې هوکړه لاسليک کړه چې په وينا يې لا يې هم پنځه نوي سلنه مادې نه دي عملي شوي او ګڼ شمير بنديان يې په زندانونو کې دي.
