سرچینه: حکومت دقطر بین الافغاني غونډې ته ۱۵۰ کسیز پلاوی ټاکلی
کابل ټکی کام (دوشنبه، ۲۶وری، ۱۳۹۸ل)
د هېواد دروانې قضیې دحل په موخه د بین الافغاني ناستې دوهمې غونډې ته له ډېرو لانجو او اختلافاتو وروسته ګډحکومت خپل پلاوی ټاکلی دی.
بي بي سي، اونورو رسنیو ته يوې دولتي سرچينې ويلي دي چې د پخلاينې مشرتابه شورا سره د څو ورځو د جر او بحث وروسته يې د قطر بين الافغاني ناستې ته شاخوا ۱۵۰ کسيز پلاوی ټاکلی دی.
سرچينې زیاته کړې چې په دې کسانو کې به د افغانستان ځينې وزيران، واليان، د سياسي ګوندونو مشران او د ښځو استازې شاملې وي.
تر دې وړاندې له افغانستان څخه د قطر بين الافغاني ناستې ته د غړو ټاکلو په سر اختلافات او ناندرۍ موجودې وې چې د پخلاينې د مشرتابه شورا وياند عمر داودزي هم ويلي وو چې د قطر د غونډې له پاره د خلکو په ټاکلو کار روان دی خو لاهم نندارۍ او خنډونه موجود دي.
طالبانو هم تر دې وړاندې ويلي وو چې د قطر راتلونکې بین الافغاني ناستې کې به د طالبانو شاوخوا ۲۵ کسيز پلاوی ګډون وکړي چې په کې به د دوی د مرکچي پلاوي غړي هم شامل وي.
هغوی دا هم ويلي وو چې د قطر په بين الافغاني ناسته کې به هيڅوک د حکومت په استازيتوب ګډون نه کوي او هر څوک به د سولې او د افغانستان د قضيې د حل په اړه خپل نظر وړاندې کوي.
ټاکل شوې ده چې د قطر بين الافغاني غونډه د روانې ميلادي مياشتې په ۱۹ نېټه د قطر پلازمينه دوحه کې جوړه شي چې درې ورځې به دوام وکړي.
ددې ناستې په اړه دحکومت اوسیاسیونو پلاوي جلا جلا، ټاکل کېږي، اواستول کیږي.
