غزني: طالبانو دګېرو ولسوالۍ نیولې، خوچارواکي یې دانتقال دعوه کوي
کابل ټکی کام ( جمعه، ۳۰وری، ۱۳۹۸ل)
طالبانو دغزني ولایت دګېرو ولسوالۍ نیولې، خو حکومتي چارواکي وايي چې ددې ولسوالۍ مرکز يې بلې سيمې ته لېږدولى.
بعضو سرچینو خبرورکړی چې تېره شپه د غزني ولايت په ګيرو ولسوالي کې درنه جګړه شوې ده.
د رارسېدلو معلوماتو له مخې وسله والو طالبانو د ولسوالي پر ودانۍ او امنيه قوماندانۍ ډله ئيز او پراخ بريدونه کړي دي .
د سرچینو له مخې دواړه لوري تلفات لري ، خو کره شمېرې یې لا نه دي تر لاسه شوی.
د کورنيو چارو وزارت يوې سرچينې هم د پوليسو په لوړه کچه تلفات تايد کړل خو تفصيل يې ور نکړ.
بلخوا نن د ملي دفاع وزارت په خبرپاڼه کې راغلي چې د ګيرو ولسوالۍ د خلکو د غوښتنې او له حکومتي چارواکيو سره تر سلا مشورو وروسته بلې سيمې ته ولېږدوي.
د غزني د والي ویاند محمد عارف نوري هم ، وايي چې د يادې ولسوالۍ مرکز د کابل کندهار لويې لارې ته څېرمه د همدې ولايت د قره باغ ولسوالۍ د باران کلا سيمې ته لېږدول شوى دى.
یاده دې وي چې تردې وړاندې دغزني ولایت دڅلورو نورو ولسوالیو مراکز هم ددې ولایت مرکز ته لېږدول شوي وو.
