ليکنه: غورځنګ
دا چې د بين الافغاني تفاهم په اړه همېشه طالبانو په خپلو اعلاميو کې ولس ته ډاډ ورکړی دی چې دوی بين الافغاني تفاهم ته تر ټولو ډېر ژمن او لېوال دي خو اوس دا موضوع مهمه نه ده بلکې د اشغال خاتمه مهمه ده، ځکه چې په سيمه کې اشغال د فساد او نورو ناخوالو د مور او منبع حيثيت لري نو اړينه ده چې دا منبع او د فساد مور بايد تر ټولو لومړی له منځه يووړل شي او کله چې اشغال له منځه يوړل شي نو بيا به په ازاده او ډاډمنه فضا کې بين الافغاني تفاهم تر سره شي، له هغه وروسته به هر هغه چا ته چې ځانونه د افغانستان په کشاله کې دخيل او شامل بولي، طالبان د افغانستان په اړه خپله تګلاره وړاندې کوي او د طالبانو تر ټولو زياته هڅه به هم دا وي چې د تفاهم له لارې مسئلې حل کړي خو که بيا هم چا جنګ غوښته نو بيا خو بې له جنګه بله چاره نشته.
د همدې لپاره چې هېوادوال ډاډمن کړي د روسيې په کوربه توب يې په مسکو کې يو بين الافغاني کنفرانس هم داير کړ چې د کابل د ارارې مخکېنيو او پخوانيو چارواکو په کې ګډون درلود، دغه کنفرانس که څه هم ډېر مفيد او ګټور وو خو د کابل ادارې يې د خپل عادت له مخې په اړه غبرګون وښود او له هماغه راهيسې يې د سولې په ضد دريځ ونيو.
اوس چې بيا طالبانو له خپلې کړې ژمنې سره سم د بين الافغاني تفاهم تر عنوان لاندې په خليلجي هېواد (قطر) کې يو د کنفرانس د داريرېدلو اعلان وکړلو او له بې طرفه افغانانو څخه يې د ګډون غوښتنه هم وکړله او تر څنګ يې بار بار دا اعلانونه هم وکړل چې له حکومتي لوري سره به ليدنې نه کوي او همداشان په ياد کنفرانس کې به هم څوک د حکومت له لوري نه غږېږي بلکې خپل شخصي دريځ به بيانوي.
د طالبانو په اعلان شوي کنفرانس کې د ګډون کولو لپاره له مختلفو هېوادونو او افغانستان څخه افغانانو د تياري تابيا ونيوله خو په دې وخت کې ولسمشر غني د خپل عادت سره سم يو ځل بيا هڅه وکړله چې دغه کنفرانس لغوه او له منځه يوسي نو ځکه يې په بې ځايه خبرو او بې ځايه ويناګانو باندې پيل وکړ، کله به يې ويل چې د ياد کنفرانس مشري به افغان حکومت کوي، چې د دولت په دې خبرې سره سړي ته هغه د توره دې لالا وهي، مړۍ دې عبدالله وهي؛ متل ورياد شي. ځکه چې کنفرانس د طالبانو په ابتکار جوړېږي او مشرۍ به يې د ولسمشر ټيم کوي؟ عجيبه انصاف دی؟
تر ټولو مهمه لا دا چې ولسمشر له خپله اړخه په ياد کنفرانس کې د ګډون کولو لپاره د دوه نيم سوو کسانو لېست خپور کړ چې به دې کې داسې خلک هم وو چې بې چاره ګان په خبرو کولو هم نه پوهېږي.
خو خير په هر صورت.
راځو دې ته چې د ولسمشر غني دوه نيم سوه کسيز ګروپ په ياد کنفرانس کې د کې د ګډون احتمالات څومره وو؟
يو خو دا چې د ياد کنفرانس لپاره چې کوم ځای ټاکل شوی وو، د دومره کسانو د ځايېدو ظرفيت شايد ونه لري، نو غني ولې په خپل بې هوده عقل د دومره کسانو لېست اعلانولو؟
دويم دا چې په ياد کنفرانس کې خو به حتماً ټولو ګډونوالو خپل خپل نظرونه وړاندې کول، او دغو نظرونو وړاندې کولو به خامخا وخت نيولو، نو که فکر وکړو چې د غني دوه نيم سوه کسانو څخه به هر يوه ته څومره وخت پس نمبر او نوبت رسېدلی وای؟
دريم دا چې که چېرته د وخت په اساس ووايو نو دغه کنفرانس به څومره وخت نيولو؟ ځکه که چېرته هر ګډونوال نيم ساعت خبرې وکړي نو څومره وخت به ونيسي؟؟ په داسې حال کې که د طالبانو پنځه ويشت کسيز پلاوی او د قطر دولتي مامورين او همدارانګه کوم نور مېلمانه ورسره حساب شي نو شمېر يې له درې سوو وراوړي. نو که فکر وکړو چې هر يوه ته د وينا کولو لپاره څو ورځې پس نوبت ورسېږي؟؟ ځکه چې ورځ او شپه خو څلرويشت ساعته وي او ياد کنفرانس خو تقريباً که د کسانو د شمېر له مخې هر يوه ته د وينا کولو وار ورکړل شي نو اټکلاً به تقريباً مياشت وخت نيول کېږي.
او تر ټولو مهمه دا چې دولت د ياد کنفرانس له پيل کېدو څخه مخکې مخکې خپل هر يوه کس ته د سولې ضد برنامې ورکړې وې او هڅه يې کوله چې د کنفرانس په ترڅ کې يو ډول تشنج او شخړه هم رامنځته کړي.
نو په دې اساس ياد کنفرانس چې د هر چا لخوا لغوه اعلان شوی وي ښه کار ځکه شوی دی چې ولسمشر ارادې ښې نه برېښېدې. او کېدای شوای چې ولسمشر په خپل ټول توان په دغه غونډه کې تخريب رامنځته کړی وای.
