کابل ټکی کام ( یکشنبه، ۱ غوايي ، ۱۳۹۸ل)
د تخارولایت په دشت کلا ولسوالۍ کې ایخانم بندر او د پوله ساتو ځواکونو کمیساري له څلورو ورځو راپدیخوا د طالبانو له لوري په کلکه کلابندۍ کې قرارلري. سیمه ییز چارواکي وايي مرستندویه ځواکونه سیمې ته رسېدلي، خو د سیمې اوسېدونکي وايي د طالبانو ځپلو لپاره د مرستندویه ځواکونو هڅې تر اوسه بې پایلې دي.
د تخار سیمه ییز چارواکي مني چې د ایخانم بندر سربېره، طالبانو د دشت کلا ولسوالۍ ډېره برخه په خپله ولکه کې راوستې. د وروستیو نښتو له امله سلګونه کورنۍ د خپلو مېنو پرېښودو ته اړې شوي دي.
د دشت کلا ولسوال عبدالمناف فیضي رسنیو ته وویل چې طالبان اوس مهال ولسوالۍ او د پولیسو قوماندانۍ ته نژدې شوي او د طالبانو ځپلو له پاره د امنیتي ځواکونو هڅې تر اوسه بې پایلې دي.
ښاغلی فیضي وايي د لارو بندېدو له امله، د ایخانم بندر کمیساري یو ټپي پولیس، د درملنې لپاره ګاونډي هیواد تاجکستان ته لېږدول شوی.”امنیتي وضعیت کړکېچن دی، په دشت کلا کې مخالفان بریدونه کوي، ایخانم بندر کلابند دی، اکمالاتي لارې یې بندې دي، د دشت کلا ښار په سل – یو سلو پنځوس مترو کې طالبان دي، مرستندوی ځواکونه چې راغلي وو تېره شپه یې په ایخانم او زوړ ښار سیمو کې عملیات پیل کړل، یو څه پرمختګ یې کړی وو، خو نن سهار یې بېر ته شاتګ وکړ.
اوس مهال عملیات بند دی، خو پلان جوړ شوی چې بېرته پیل شي.”له دوه اونیو راپدیخوا، طالبانو تاجکستان سره پر پوله دشت کلا ولسوالۍ نیولو له پاره خپل بریدونه ډېر کړي دي. د سیمې اوسېدونکي وايي چې اوس مهال د دغې ولسوالۍ پر ډېره برخه طالبان ولکه لري.
ایخانم بندر هم له څلورو ورځو راپدیخوا د طالبانو له لوري کلابند دی.تالقانو کې یو سیمه ییز خبریال او د ای خانم د سیمې اوسېدونکی اسد الله زمری وايي د هرې ورځې په تېرېدو دپوله ساتو ځواکوو اندېښنې ډېرېږي.” له څلورو ورځو راهیسې ایخانم بندر او کمیساري د طالبانو له لوري کلابند دي، ټولې لارې بندې دي، په ټول دشت کلا حالات کړکېچن دي، طالبانو ښار کلابند کړی، نن سهار طالبانو ښار ته نژدې د تلاجات په نامه یوه سیمه ونیوله، ډېر امنیتي ځواکونه راغلي خو خپلو کې همغږي نه دي، ځکه پرمختګ نه شي کولی.
“تېرکال هم څو وارې ایخانم بندر د امنیتي ځواکونو او طالبانو ترمنځ لاس په لاس شو.
یاده دې وي چې طالبانو دخپلوپسرلنیو عملیاتو له پیلېدا سره سم خپلو جګړو ته زور ورکړی چې په ترڅ کې یې ډېرې ستراتیژکې سیمې ترخپلې ولکې لاندې راوستي.
