امریکا پنځو هیوادونو، چین، ترکیې، جاپان، جنوبي کوریا او هند ته اجازه ورکړې وه چې د ایران تیل اخستلای شي خو د ډونالډ ټرمپ د نوې پرېکړې له مخې چې دا اجازه د راروانې میاشتې په دوهمه نیټه پای ته رسیږي
سپینې ماڼۍ ویلي، ډونالډ ټرمپ اراده نلري چې دا معافیت دې تمدید کړي
د می میاشتې له دوهمې نیټې وروسته دا پنځه هیوادونه د امریکا له بندیزونو سره داسې مخ کیږي چې نور دوی له ایران څخه تیل نشي اخستلای
ایران د امریکا دا کار غیر قانوني بولي او وایي چې دوی به د امریکا دې اقدام ته هېڅ ارزښت ورنکړي
اسرائیلو د ایران په وړاندې د امریکا دا ګام ستایلی خو ترکیه بیا وایي چې دا بندیزونه د سیمې امنیت له ګواښ سره مخ کوي
امریکا د ایران په یو شمیر نورو شرکتونو هم بندیزونه لګولي او همدا رنګه یې په دې وروستیو کې د ایران تر ټولو قوي پوځي ډله سپاه پاسداران هم په تور لیست کې شامله کړه
