نن يو ځل بيا په فراه کې د بهرنيانو پر مرکز توغنديز بريد شوی
(کابل ټکی کام، ۱۳۹۸، غویی ۴)
د راپورونو له مخې نن سهار د فراه ولايت په هوايي ډګر چې پکې په زيات شمير بهرني عسکر هم ميشت دي د توغنديو بريد شوی.
هوايي ډګر ته نږدې سرچينې وايي، توغندي نن سهار د فراه هوايي ډګر په داخل کې لګيدلي چې بهرنيانو ته يې تلفات اړولي دي.
تر اوسه د دغه تلفاتو کره معلومات نه دی ترلاسه شوی خو ويل کيږي توغندي د بهرنيو ځواکونو ميشت ځايونو ته نږدې لګيدلي دي.
له بله پلوه طالب وياند قاري يوسف احمدي په خپله ټويټر پاڼه ليکي: په یاد هوايي ډګر د طالبانو له خوا درې توغندي وار شوي چې د امريکايي عسکرو په میشت ځايونو لګيدلي او هغوی ته پکې دروند مالي او ځاني زيان اوښتي دی.
تيره ورځ هم طالبانو په یاد هوايي ډګر د توغنديو بريد کړی و چې د طالبانو په وينا په بريد کې د هوايي ډګر رادار له منځه وړل شوی و او بهرنيانو ته يې تلفات اړولي و.
د بګرام په شمول طالبان وخت ناوخت د بهرنيو ځواکونو پوځي مرکزونه د توغنديو هدف ګرځوی چې هغوی ته پکې تلفات اوړي خو بهرنيان دغه تلفات د خپلې پاليسۍ له مخې نه په ډاګه کوي.
