کابل ټکی کام ( جمعه، ۲۰غوايي، ۱۳۹۸)
نیویارک ټایمز ورځپاڼې په افغانستان کې د تیرې اونۍ د تلفاتو په اړه راپور خپور کړی دی.
ټایمز لیکلي چې یوازې په تیره یوه اونۍ کې ۸۰ تنه پولیس وژل شوي دي.
ورځپاڼه دا راپور په داسې حال کې نشروي چې تازه د روژې میاشت رابرسیره شوې او طالبانو خپلو بریدونو ته همداسې د تیر په څیر دوام ورکړی دی.
طالبانو وړمه ورځ په کابل ښار کې د کاونټر پارټ په امریکایي شبکه برید وکړ چې د ۴۰ تنو کورني عسکرو او بهرنیو کارمندانو د وژل ادعا یې وکړه.
همدا رنګه په غزني، فاریاب، قندوز، بدخشان او پکتیا کې هم د طالبانو په بریدونو کې لسګونه امنیتي ځواکونو ته مرګ ژوبله اوښتې ده.
نیویارک تایمز د ملکي تلفاتو په اړه هم خبر ورکړی او ویلي یې دي، چې په تیره اونۍ کې ۴۷ ملکي کسان وژل شوي دي.
ورځپاڼې دا نه دي ویلي چې ملکي کسان د چا په بریدونو کې وژل شوي خو د ګډو ځواکونو په عملیاتو کې څو ورځې وړاندې په فراه کې ۱۰۰ تنو بیګناه افغانانو ته مرګ ژوبله واوښته.
همدا رنګه د ارزګان په ترینکوټ کې هم د امریکایي او افغان ځواکونو په هوایي بریدونو کې ملکیانو ته مرګ ژوبله واوښته او وړمه شپه بیا د ننګرهار په چپرهار کې هم ګډو ځواکونو بشپړ کور وسوځاوه او د دوو کسانو د سوځیدو تر څنګ یې د قران نسخو ته هم اور وراچولی وو.
