لیکوال: امین وردګ
آمریکا غواړي چې (د خپلو متحدینو او تاله څټو په ملتیا سره یې) اسلامي قوت او اخوت لا پسې دړې وړې کړي او یومخ یې له منځه یوسي ؛ نو مسلمانانو ته هم پکار ده چې (د غرب سیاسي چالو ته په کتو سره) متحد شي او تر یوې قوماندې لاندې له خپلو اسلامي او ملي ارزښتونو څخه په کلکه دفاع وکړي او هڅه وشي چې اسلامي نړۍ یو ځل بیا سره وتړل شي او د استقلال سپین بیرغ پرې و رپيږي.
تاسو له هغه وخته باید تاریخ ښه په غور سره وګورئ؛ له کوم مهال څخه چې غربیانو آخرنی مرچل یعنې اسلامي خلافت له منځه یووړ، بیا تر نن پورې.
اې! کله چې د مسلمانانو وروستی خلافت (عثماني خلافت چې له ترکیې څخه به یې ټوله اسلامي نړۍ اداره کوله) د غربي او شرقي دښمنانو په لاس د کمال اتاترک په ګټه را وپرځېدو؛ یوازینی علت یې د مسلمانانو تر منځ د اتحاد انهدام او بې غوري وه.
عثماني خلافت تر پایه یهودانو ته دا اجازه ورنکړه چې د سیناغره په شاوخوا کې سره راټول شي، مګر کله چې اسلامي خلافت ړنګ شو او د مسلمانانو سرتاسري اتحاد ختم شو، نو سهیونیزم ته موقع په لاس ورغله او د صلیب سره تر موافقې او مفاهمې وروسته یې شیطاني مرکز جوړ کړ او لښکرې یې د سرطاني جراسمو په څېر راوټوکېدلې، چې وروسته – وروسته یې بیا ځینې عربي جزیرې هم پسې ولړزولې او د عربو دروازې یې په لغتو ور ووهلې.
نه غواړم چې بحث اوږد کړم، راځم هغه اصل مطلب ته مې:
وګورئ او له عقل نه کار واخلئ!
نن د غربي ښکېلاکګرو له خوا په ټوله اسلامي نړۍ کې ناتار جوړ دی.
هرې خواته د مسلمانانو په وینو رودونه او سیندونه ډک بهیږي.
هر ځای مسلمانې تور سرې د کفري دهشتګرو د خرمستیو ښکار شوې؛ څوک د فیزیکي اجبار له وجهې او څوک هم د شیطاني سیکو په زور.
هوکې!
غربیان لومړی د اسلامي وحدت په پاشلو ښه بریالي شول، وروسته یې د جهادي مفکورې په زیانولو لاس پورې کړ؛ تر دې چې د جګړې ډګر ته د شوروي اتحاد پر راکشولو هم کامیاب شول؛ له هغه وروسته یې پر وړاندې افغان مجاهدین هم وهڅوول او سرې لښکرې یې پرې دړې وړې کړې.
دوی خپل شرقي سیال د افغانانو په مټو مات کړ! مګر دا چې د افغانانو اتلولۍ هم ورته له زغم څخه وتلې وې او نه یې غوښتل چې افغانان دې د عصر قهرمانان ومنل شي؛ نو ځکه یې ځینې جهادي رهبران… تر دې پورې هم و لمسلول او وروزل چې آن د خپل تیرې په مهال او بیا تر اوسه یې دا دي د ښکاري تازیانو په توګه وکارول او لایې پسې کاروي.
نو د دوی ستر هدف او مطلب دا ؤ چې افغانان قهرمانان نشي او جهادي مفکوره په سر کې پوره زیانمنه او بیا پسې یو مخ له منځه لاړه شي؛ چې تر یوه ځایه په خپلو پلانونو کې بریالي هم شول.
اما الله پاک خپل کار په خپله او په غور سره کوي؛ دا ځل یې نورې فرښتې راوټوکولې؛ داسې ښکاري: لکه چې ټوله غربي نړۍ پرې ماتوي.
زه دا باور لرم! تر څو چې غربي کاسه څټونکي سیمه ایز اتحاد ته زیان رسوي او د پاکستان، ایران، ازبکستان او تاجکستان په نوم شوم تبلیغات کوي؛ نو د مسلمانانو حال به تر دې هم بدتر شي.
پرون یې افغانستان لاندې کړ، په دا بله ورځ عراق، پسې شام، بیا فلسطین خو سبا وار د ایران او بیا ورپسې پاکستان، قطر او په پای کې سعودي عربستان دی؛ چې عملاً به یې داسې اشغال کړی لکه نن چې سهیونستانو قدس اشغال کړی؛ بیا به نو حرمینو ته هم د غربیانو له اجازې پرته څوک نشي ننوتلای.
راځئ چې د اسلامي اتحاد ضد غربي کاسه څټي وپېژنو او هغه هم دقیقاً هغه خلک دي؛ څوک چې د اسلامي یووالي مخه په انګلیسي مرزونو او باډرونه سره نیسي.
اسلامي ځواکونه او حکومتونه چې څو، تر خپلو منځونو (د پردیو په نغوتو او مداخلو سره جوړې شوې) پولې او مرزونه له منځه یونسي؛ هېڅکله به هم د غلامۍ زنارونه له خپلو مریو څخه لیرې نکړای شي.
شرم دی هغو کسانو ته چې د غربي ځناورو تر څنګ ولاړ دي او د هغوی په تشو اشارو سره خپل مسلمانان وروڼه او خویندې په مسقیمه، يا غیرمستقیمه توګه وژني.
دوی باید په دې پوه شي؛ چې کله د غربیانو ورته اړتیا نه وي او ختمه شي؛ نو د خپلو سپیو سره به یې هم پرتله نه کړي! غربیان به تر ماتې وروسته خپل سپي له رسیو ونیسي، مګر دغه (مسلمان ډوله) غلامان به د کوڅه ډبو سپو په توګه یا ووژني او یا به یې په لارو او کوڅو کې خوشې کړي.
