(کابل ټکی کام، ۱۳۹۸، غویی ۲۹)
د سعودي پاچا سلمان بن عبدالعزيز آل سعود پر سعودي او عربي متحده اماراتو د ممکنه حملې په اړه بيړنۍ غونډې رابللې دي.
پاچا د خليجي هيوادونو د همکارۍ شورا غړي او نورو عربي هيوادونو مشران دوو بيړنيو سرمشريزو ته وربللي څو د ممکنه حملو په اړه په يادو غونډو کې بحث او د سیمې د امنيت په اړه خبرې وشي.
د سعودي د بهرنيو چارو وزارت هم تاييدوي وايي، دغه سرمشريزې به د روانې مئ مياشتې په دېرشمه نيټه په مکه مکرمه کې جوړې شي.
د سعودي د بهرنيو چارو وزارت سرچينې وايي، د سرمشريزو جوړولو هدف دا دی چې د عربي ټولنو، د همکارۍ شورا غړو او عربي هيوادونو سره همغږي رامنځته او په سيمه کې امنيت ټينګ شي.
سعودي په داسې حال کې د بيړنيو سرمشريزو د جوړيدو بلنه ورکړې چې په خليجي سيمه کې د امريکا او ایران شخړه مخ پرزياتيدو ده او دغه راز یادې انديښنې وروسته له هغې ډيرې شوې چې عربي متحده اماراتو ته څيرمه پر سوداګريزو بيړيو بريدونه وشول ، څلور بيړۍ پکې ويجاړې شوې، دغه راز په سعودي کې د تيلو پر دوو زخيرو د بريدونو له کبله د یادو هيوادونو انديښنې لا زياتې شوي چې اوس دغه هيوادونه د ممکنه سترو حملو ويرې اخيستې دي.
تر اوسه اماراتو د یاد بريد د څرنګوالي په اړه څه نه دي ويلي او همدارنګه سعودي عربستان ويلي و چې د اماراتو په اوبو کې ويجاړې شوې د تيلو دوه بيړۍ د دوی وې.
حوثي شيعه ګان چې په يمن کې د ايران په ملاتړ جګړه مخته وړي وخت ناوخت پر سعودي اهدافو بريدونه کوي او مسؤوليت يې هم په غاړه اخلي.
