عراق: د امريکا سفارت ته نږدې توغنديز بريد او د ټرمپ خبرداری
(کابل ټکی کام، ۱۳۹۸، غویی ۳۰)
د عراق په پلازمينه بغداد کې د امريکا سفارت ته څيرمه په “ګرين زون” کې توغندي لګيدلي چې د یاد توغنديز بريد وروسته ولسمشر ټرمپ ایران ته خبرداری ورکړی دی.
دغه توغندي د امريکا سفارت په یو کيلو مترۍ کې چې تر ټولو امن سيمه بلل کيږي لګيدلي دي.
له یادو توغنديز بريد څو شيبې وروسته د امریکا ولسمشر ټرمپ په خپل ټويټ اکاونټ خبرداری ورکړ ایران دې هيڅکله امریکا ته ګواښ نه جوړوي او که د واشنګټن ګټې په خطر کې ولويدې، ایران جګړه وغواړي نو دا به د ایران د ویجاړۍ مانا ولري.
په وروستيو کې د امريکا او ايران اړيکې ترينګلي شوي چې له کبله يې امريکا د ممکنه جګړې د پيښېدو لپاره منځني ختيځ ته د جنګي الوتکو ليږدونکې کښتې، جنګي بيړۍ او دغه راز ۵۲ بم غورزونکې الوتکې استولي دي.
امريکا تيره اوونۍ په عراق کې د خپل سفارت اضافه کارکوونکي بيرته ستانه کړې او دغه راز په يوه تازه اقدام کې يې د خپلو نا اړینو کارکوونکو د ايستلو امر هم کړی چې په وينا يې دوی استخباراتي معلومات لري چې هلته د ایران له خوا امريکايي ځواکونه تر ممکنه ګواښ لاندې دي.
که څه هم تيره اوونۍ امریکايي او ايراني چارواکو د جګړې له پيښېدو ليرې خبرې کولې خو له تازه څرګندونو او کړنو ښکاري چې دواړه هيوادونه جګړې ته نږدې کيدونکي دي.
