(کابل ټکی کام، ۱۳۹۸، غویی ۳۱)
د میدان وردګو ولايت په سیدا اباد او نرخ ولسواليو کې د عملياتو او بې پيلوټه الوتکې بريد کې لس تنه وژل شوي او دغه راز په ننګرهار کې هم په ملکي خلکو د ډرون حمله شوې ده.
راپور زياتوي، د میدان وردګو نرخ ولسوالۍ د عمرخيلو دادل تنګي سيمه کې د عملياتو پر مهال اووه ملکي وګړي وژل شوي دي.
ځايي اوسيدونکي وايي، په دغه عملياتو کې د خلکو دوکانونه سوځول شوي او ګڼ مالي زيانونه يې هم اړولي دي.
دغه راز پرون غرمه د سيدااباد په جورزين سيمه کې د بې پيلوټه بريد کې دې ماشومان وژل شوي دي.
ويل کيږي، یادو کوچنيانو په غره کې خاشاک ټولول چې ډرون حمله پرې وشوه.
په یو بل خبر کې ويل شوي چې پرون ماښام د ننګرهار پچير اګام پننګزيو دودیارو کلي کې په يوه ډرون حمله کې درې تنه وژل شوي دي.
د راپور له مخې، وژل شوي کسان (کريم، اکرم او وکيل) نوميږي چې هيڅ وسله والې ډلې سره يې اړيکې نه لرلې او د حملې پر وخت د خپلې رمې پسې روان ول.
د ملکي خلکو د خوندیتوب او عدالت غوښتنې ډلې په يوه تازه راپور کې ويلي چې په هلمند او میدان وردګو کې د ګډو ځواکونو د عملياتو پر مهال ۱۶ ملکیان وژل شوي او ۱۴ نور ټپیان دي.
د ګډو ځواکونو عمليات او ډرون حملې په وروستيو کې تر ډيره ملکي اهداف او ولسي وګړي په نښه کوي چې لا هم دغه لړۍ روانه ده او د هرې ورځې په تيريدو د ملکي خلکو مرګ ژوبله زياتيږي خو تر اوسه مسؤولو خواوو، د بشري حقونو بنسټونو او یوناما يې په اړه لازم اقدامات نه دي کړي.
