زابل: پوليس خپل څلور عسکر ملګري وژلي؛ خپله طالبانو ته ورغلی
(کابل ټکی کام، ۱۳۹۸، غویی ۳۱)
د زابل ولايت په ارغنداب ولسوالۍ کې یوه پوليس خپل څلور عسکر ملګري وژلي او خپله طالبانو ته ورغلی دی.
پيښه نن سهار د یادې ولسوالۍ مربوط د سرخ سنګ سيمې کلي ته نږدې د کوټنۍ په پوسته کې رامنځته شوې ده.
د زابل امنيتي سرچينې پيښه تاييدوي په وينا يې نوموړی پوليس له ډيرې مودې راهيسې په پوليسو کې دنده کړې او سهار مهال د خپلې پوستې ملګرو له وژلو وروسته لادرکه شوی دی.
طالب وياند قاري يوسف احمدي په خپله رسمي ټويټر پاڼه ليکي، چې نوموړی پوليس د دولت په نظامي ليکو کې د دوی نفوذي کس و چې څلور پوليس يې وژلي او له وسلو سره طالبانو ته ورغلی دی.
د احمدي په وينا، بريدګر پوليسو طالبانو ته له ځان سره نهه ميله بيلابيل ډوله وسلې او مهمات هم وروړي دي.
طالبانو تر دې مخکې هم د ورته ډول بریدونو مسؤوليت په غاړه اخيستی او په خپلو اعلاميو کې يې ويلي چې د دولت په نظامي لیکو کې لسګونه نفوذي کسان لري چې له موقع څخه په استفادې به په بهرنيو او دولتي چارواکو او نظامي کسانو بريدونه کوي.
