غزني: طالبانو د خپلو ملګرو وژل کیدل رد کړل
کابل ټکی کام( سه شنبه، ۳۱غوایي، ۱۳۹۸)
د غزني ولایت چارواکو ادعا کړې چې د دې ولایت په دهیک ولسوالۍ کې یې د دې ولسوالۍ لپاره د طالبانو د نومول شوي ولسوال په ګډون ۴۲ تنه طالبان وژلي دي.
د طالبانو ویاند ذبیح الله مجاهد پخپل ټویټر د افغان حکومت دا ادعا په کلکو ټکو رد کړې او ویلي یې دي چې په سیمه کې ۴ تنه عام کلیوال وژل شوي دي.
د مجاهد په وینا چې امنیتي ځواکونو ۹ تنه کلیوال هم له ځان سره د بندیانو په توګه وړي دي.
د یادونې وړ ده چې افغان حکومت اکثره وخت ورته ادعاوې کوي خو د سیمې خلک او طالبان هر وخت داسې ادعاوې ردوي او پروپاګند یې بولي.
په دې وروستیو د ګډو ځواکونو په عملیاتو کې زیات وخت ملکي کسانو ته مرګ ژوبله اوړي خو حکومت یې د مخنیوي لپاره تر اوسه کوم ګام نه دی اوچت کړی.
مجاهد دا ځل هم د افغان حکومت د دې ادعا په اړه ویلي چې دوی یوازې د عامو افغانانو په وړاندې عملیات کولای شي.
د مجاهد په ټکو: “مزدور دښمن هره ورځ په غزني کې دا ډول کاذب راپورونه خپروي، او د ملکي خلکو په ضد عملیات د مجاهدینو په وړاندې تلقي کوي چې حقیقت نه لري، دوی یواځې په بې دفاع خلکو بریدونه کولای شي بس.”
