کابل ټکی کام (جمعه، ۳غبرګولی، ۱۳۹۸ل)
مسکو د روانې میلادي میاشتې په ۲۷ نېټه د افغانستان سره د اړیکو د سلیزې د لمانځلو په پار د یوې غونډې کوربه دی چې له افغانستان څخه په یو شمېر سیاسیونو سربېره طالبان هم ورته بلل شوي.
قطر دفتر ته یوې نږدې سرچینې د مسکو په راتلونکې غونډه کې د طالب استازو ګډون ومانه خو د ګډون کوونکو کسانو نومونه یې مشخص نکړل.
د مسکو او کابل تر منځ د اړیکو د سلیزې پوره کېدو ته له افغانستان څخه په یو شمېر سیاستوالو سربېره پخوانی حکومت مشر «حامد کرزی» هم بلل شوی.
حامد کرزي په همدې تړاو په خپله فسبوک پاڼه څرګنده کړې چې د روسیې سفیر ورته په مسکو کې د غونډې بلن لیک رسولی او د نوموړي له لوري په یاده غونډه کې ګډون منل شوی.
مسکو داسې مهال طالبان له حکومتي چارواکو سره یو ځای یوې غونډې ته بولي چې، له افغانستان څخه د امریکایانو د وتلو او واک ته د طالبانو د بیرته راګرځېدلو اوازې ګرمې شوې.
د شنونکو په باور، نړیوال طالبان اوس د ګډ حکومت د یوه بدیل او د افغانستان د راتلونکي واکمن په حیث پېژني نو له همدې امله هڅه کوي له هغوی سره اړیکې ورغوي او د افغانستان په اړه خپلې اندېښنې ورسره شریکې کړي.
په واشنګټن کې مېشت د سیاسي چارو کار پوه «وحید فقیري»، له طالبانو سره د نړیوالو راشه درشه او تودې اړیکې د ګډ حکومت لپاره د خطر زنګ او په سیاسي ډکر کې د حکومت په تابوت د وروستیو مېخونو ټک وهل بولي.
بلي خوا ګډ حکومت له ورته پرېکړو دخطر احساس کوي، څو ورځې وړاندې چې کله یوشمېر بهرنيو استازو دطالبانو دسیاسي دفتر له رئیس ملا برادر سره لیده کاته وکړل، دکابل حکومت دا کتنې خپل مشروعیت ته ګواښ وباله، او دمخنیوي لپاره یې ګواښونه وکړل.
خوداچې دمسکو دې اقدام ته به کابل کوم ډول غبرګون ښکاره کړي، دالامالومه نده!.
