کابل ټکی کام (چهار شنبه، مرغومی ۲۳مه، ۱۳۹۴ ل):
تېره ورځ د ایران سمندري ځواک د امریکې دوې کوچنۍ سمندري بېړۍ چې ۱۰ تنه امریکايي چلونکي په کې سپاره وه نيولي دي.
د نړيوالو خبري آژانسونو د راپورونو له مخې دغه دوې بېړۍ د بحرین او کوېټ ترمنځ فارس سمندرګي ته ننوتلې وې چې ایراني سمندري ځواکونو ونيولې.
پنټاګون خبر ورکړی چې دغه بېړۍ په نوموړي سمندرګي کې کرځېدلې له پنټاکون سره يې اړېکه بنده شوه او بیا وروسته ورته خبر ورکړل شو، چې ایران نيولي دي .
ایران د امريکې د دوو کښتيو نیول تائیدوي او وايي چې د ۹ نارینه و ترڅنګ یوه ښځينه عسکره هم د بېړۍ په چلونکو کې شامله ده چې ددوي په لاس کې دي .
واشینگټن وايي ددوې دغه دوې بېړۍ قصدا نه بلکه د یوې اتفاقي پېښې له وجې لار ترې بدله شوې، او دوي ډاډمن دي چې نن ورځ به ددوي بېړۍ له عسکرو سره خوشې شي.
ډيلي ميل له برتانيې خپرېدونکې ورځپاڼې لیکي، چې د امریکا د بهرنیو چارو وزیر جان کېري له ایراني چارواکو سره په دې اړه خبري کړي بېړۍ به بېرته ژر خوشي کړي .
او ځیني راپورونه وايي چې یوه بېړۍ د تخنیکي ستونزې له امله د ایران مسیر ته سیخه شوې او دویمه يې د هغې په تعقب ورغلې او دواړه یو ځای ایران سمندري ځواک نيولي دي .
راپور زیاتوي چې امریکا له ایران څخه په جدي ډول غوښتنه کړې، چې ددوي دواړه بېړۍ او عسکر ژر تر ژره خوشې کړي .
سلیم بریال
