کابل ټکی کام( پنجشنبه، ۹غبرګولي، ۱۳۹۸)
د ولسمشر غني پخوانی سترسلاکار جنرال حبیب الله احمدزی ولسمشر غني په عدلي او قضایي ارګانونو کې په مداخله تورن کړی دی.
احمدزی وایي، ولسمشر غني له لویې څارنوالۍ څخه خپل دفتر جوړ کړی او د ده خوښه پکې چلیږي.
حبیب الله احمدزي دا خبرې له هشت صبح ورځپاڼې سره په مرکه کې کړي دي.
نوموړی لویه څارنوالۍ وروسته له هغه د ولسمشر غني دفتر بولي چې درې ورځې وړاندې د لویې څارنوالۍ ویاند جمشید رسولي یوه خبري کنفرانس ته وویل چې احمدزی باید د ارګ په اړه د وروستیو ادعاوو په اړه لویې څارنوالۍ ته اسناد په واک کې ورکړي.
احمدزي زیاته کړې چې دی له قانون څخه نه ویریږي بلکې له حکومتي ارګانونو څخه په ویره کې دی.
د یادونې وړ ده چې احمدزي له خورشید تلویزون سره په یوه مرکه کې ادعا وکړه چې په ارګ کې فحشا ته کار روان دی او په وینا یې ولسي جرګې ته هغه څوک کامیابیدای شي چې د ارګ خوښ وي.
د ارګ په اړه د احمدزي دې خبرو په کور دننه او په نړیوالو رسنیو کې غوغا جوړه کړه او ټولو د دې په اړه د سپیناوي غوښتنه وکړه.
