فراه: په خاک سفېد ولسوالۍ کې یو کس یوولس تنه په ډزو وژلي
کابل ټکی کام ( دوشنبه ، ۲۰ غبرګولی ، ۱۳۹۸ل)
له فراه ولایت څخه راپورونه وايي چې ددې ولایت یو اوسېدونکي یوولس تنه بې ګناه وګړي په ډزو وژلي.
د فراه سیمه ییز چارواکي وایي چې یاده پېښه ددې ولایت په خاک سفید ولسوالۍ کې رامنځته شوې.
د خاک سفېد ولسوال حاجي جمعه ویلي، قاتل چې ملا علي نومېږي د دې ولسوالۍ د رنګین اباد کلي اوسېدونکی دی.
د ولسوال په خبره ملا علي تېره ورځ لومړی د خپلې کورنۍ اته غړي د کلاشینکوف په ډزو وژلي او بیا د ګاونډي کور ته دننه شوی، د ګاونډي د کور درې غړي یې هم وژلي او شپږ نور یې ټپیان کړي دي.
د جمعه په خبره تر اوسه د دې پېښې لامل په ډاګه شوی نه دی.
بلې خوا بیا د سیمې اوسېدونکي دپېښې دتائید ترڅنګ وايي چې پر یاده سیمه دولت واک نه لري خو ملا علي طالبانو نیولی دی.
طالبانوهم د ملا علي د نیول کېدو پخلی کوي او ویلي یې دي چې دا قضیه يې خپلې اړوند شرعي محکمې ته راجع کړې ده، او دوی به دشرعي محکمې وروستۍ پرېکړې ته انتظار وکړي.
