د صحابه ؤ د شان په اړه د عمران خان خبرو ته د مفتي تقي عثماني غبرګون

کابل ټکی کام( پنجشنبه، ۲۳غبرګولي، ۱۳۹۸)

د پاکستان مفتي اعظم تقي عثماني د عمران خان هغو خبرو ته غبرګون ښودلی چې د صحابه ؤ په اړه یې کړي دي.

د پاکستان لومړي وزیر عمران خان په یوه وینا کې د صحابه کرامو په اړه ګستخانه الفاظ کارولي وو، چې غبرګونونه یې راپارولي دي.

خان ویلي وو چې د بدر په غزا کې ځکه ۳۱۳صحابه وو ګډون درلود چې نور صحابه ډارېدل.

عمران خان همدا راز د احد غزا په اړه هم په څرګندونو کې ویلي چې صحابه کرام له هغې غونډۍ څخه د “چور چپاول” لپاره راښکته شوي ول.

تقي عثماني د عمران خان دا خبرې له اسلامي تاریخه د نوموړي ناخبرتیا بولي او وایي چې د صحابه وو په شان کې داسې خبرې کول ظلم او سپکاوی دی.

تقي عثماني ویلي چې د بدر غزا یوه بیړنۍ پرېکړه وه او صحابه د جګړې لپاره نه بلکه د قریشو د قافلې د راګرځولو لپاره وتلي وو.

نوموړي د عمران خان د احد د غزا په اړه د څرګندونو په ځواب کې ویلي چې هغه د “چور چپاول” لپاره نه، بلکې یوه اجتهادي خطاء وه او الله تعالی ورته بښنه کړې ده.