(کابل ټکی کام، ۱۳۹۸، غبرګولی ۲۵)
له کابله خپريدونکې ويسا ورځپاڼې تر دې عنوان لاندې چې (امريکا سوله غواړي که داعش؟!) په خپله سرمقاله کې د داعش په اړه د امريکايي جنرال وروستۍ څرګندونې او د يادې ادعا په اړه د افغانانو نظرونه راخيستي دي.
درې ورځې مخکې د امریکا مرکزي قوماندانۍ قومندان جنرال مکنزي وويل، چې د افغانستان داعش په اړه اندېښمن دی او دغه ډله امريکا ته خطر پېښولای شي.
خو ويسا د داعش د نظر په اړه ليکي، چې دغه ډله هيڅ خطر نه دی ځکه په افغانستان کې فکري بنسټ نه لري، د سوريې او عراق د ټولنې په څېر سلفيان وجود نه لري او دلته د مذهبي فرقو تر منځ د اختلاف مخينه هم نشته.
دغه راز ويسا زياتوي، په ختيځو او شمال ختيځو سيمو کې چې د داعش د فعاليتونو عيني شاهدان دي یاده ډله د استخباراتي کړيو پيداوار بولي ” د کونړ او ننګرهار قومي مشران او د ولس استازي په زغرده دا هم وایي چې له داعش سره د طالبانو پر خلاف مرموز ملاتړ دی. د الوتکو او هلیکوپترو په واسطه د دې ډلې د غړیو د لېږد او پر طالبانو یې د تدریجي برلاسۍ خبرې کوي.”.
د ويسا په وينا، ډير کله استخباراتي پروژې سل په سلو کې پر مخ نه ځي او له ستونزو سره مخ کيږي لکه د داعش ډله هم په افغانستان کې له همدغسې حالت سره مخ شوه او طالبانو خپل ځواک وساته او یاده ډله يې مخکې پرينښوده چې جنګيالي جذب کړي.
په سرمقاله کې راغلي، له یوې خوا طالبانو سره د خبرو هڅې له بلې خوا د هغوی مرکزونه او خاصې څېرې په دې موخه هدف ګرځي چې طالبان بايد خپله جبهه داعش ته پريږدي په وينا يې د امريکايي چارواکو له خوا طالبانو سره د سولې تر څنګ پر جګړې ټينګار او د داعش د لوی خطر توجه کولو موخه دا ده چې واشنګټن په افغانستان کې یوازې د جګړې د بيرغ بڼې بدلولو هڅې کوي، نه د سولې.
