کابل ټکی کام ( يکشنبه ، ۲۶ غبرګولی ، ۱۳۹۸ل
طالبانو ته نږدې سرچينويوشمېر رسنیوته ویلي، چې دطالبانو سیاسي مرستیال او د قطر دسياسي دفتر رئيس ملا عبدالغني برادر له چینایي چارواکو سره د افغان سولې په اړه د غږېدو له پاره بېجېنګ ته تللی دی.
سرچینې زياتوي، طالبان غواړي له امریکایانو سره د خبرو تر له اووم پړاو وړاندې د خپلو دریځونو په اړه د افغانستان ګاونډیانو ته مالومات ورکړي.
نا تایید شوي رپوټونه وایي ملا برادر او ملګرو یې چې یو یې پخوانی طالب وزیر امیرخان متقي ښودل شوی، د چین د بهرنیو چارو وزارت او استخباراتو له چارواکو سره پر افغان سوله خبرې کړې دي.
دپاکستان په پلازمينه اسلام آباد کې ځایي خبریال طاهر خان وايي، چین د افغانستان په ټولو معاملاتو کې رول لري نو ځکه طالبان هم دا په پام کې نیسي. دی وايي چې د طالبانو یوه پخواني ویاند عبدالحي مطمین ده ته تایید کړې چې طالب پلاوی چین ته تللی.
طاهرخان وايي “اوس طالبان نه غواړي هرڅه د پاکستان له لارې وکړي، بلکې غواړي مخامخ یې وکړي.”
تېره می میاشت کې ملا برادر د یوه څوارلس کسیز پلاوي د مشر په توګه مسکو ته ولاړ او هلته یې له روسي چارواکو سره ډیپلوماتیکي کتنې وکړې او په بین الافغاني غونډه کې یې ګډون وکړ.
د افغانستان په سیاسي څېرو کې پخوانی ولسمشر حامد کرزی، د ولسمشرۍ د ټاکنو کاندید حنیف اتمر، د سولې د عالي شورا مشر کریم خلیلي، د بلخ پخواني والي عطا محمد نور، د اجرائیه ریاست دویم مرستیال محمد محقق او یو شمېر نورو کسانو هم د مسکو په هغه ناسته کې ګډون درلود.
طالب او امريکايي پلاوي په قطر کې شپږځلي ليده کاته کړي،خوتراوسه کومې موافقې ته ندي رسېدلي.
رپوټونه وايي چې ډېر ژر به طالب او امريکايي پلاوي اووم پړاو مذاکرات پيل کړي چې يوې موافقې ته به سره ورسېږي.
