د جلال وړانګې چې ټول انبیاء واخلي
شعر/ استاد فضل ولي ناګار
کایناتو کې رڼا د محمد (ص) ده
په تمام جهان غوغا د محمد (ص)ده
لااله یې هم مشروطه په نامه شوه
ابتدا په انتها د محمد (ص)ده
له دې لوړه مرتبه به نوره څه وي
چې د خدای رضا، رضا د محمد (ص)ده
پرې سرلوړی شو ټولی د فقیرانو
د غیور فقر قبا د محمد(ص) ده
د جلال وړانګې چې ټول انبیاء واخلي
امتي هلته نوا د محمد (ص)ده
له لمنې یې لاس مه اخله ناګاره!
غریبپالې تل درګاه د محمد (ص)ده
