«سرليکنه »
د کورنيو امنيتي ستونزو له امله په تېروو دريو لسيزو کې زیات شمېر افغانان په بهرنيو هېوادونو کې د مجبوريت شپې سبا کوي، چې له کډالو پرته په بهرنيو هېوادونو کې د افغانانو ورځ په ورځ مخ په زياتېدو ستونزې کمې نشوې ؛ بلکې لا پسې زياتې شوې.
د جرمني د کورنيو چارو وزارت ويلي، چې نور بهرنيان په خپل هېواد کې نشي منلای ، چې په دې پناه غوښتونکو بهرنيانو کې زيات شمېر افغانان دي ، چې جرمني يې له هېواده د ايستلو وينا کړې ده . د جرمني د کورنيو چارو وزارت دا هم ويلي دي: هغه بهرني پناه غوښتونکي چې ډېری يې افغانان دي د پناه غوښتلو په شرايطو هم برابر نه دي ؛ خو د جرمني حکومت ته لويه ستونزه د روان کال د جنورۍ لومړۍ د نوي کال د جشن په مراسمو کې پر يو شمېر جرمني مېرمنو تيری شوی چې پکې زيات پناه اخيستونکي ياد کړل شوي دي.
د جرمني لومړۍ وزيري انګيلا ميرکن به تل ويل ، چې د پناه غوښتونکو لپاره د جرمني د روازې پرانستي دي ؛ خو د نوي کال په مرسمو کې پناه غوښتونکو په خپلو کړنو دا خلاصې دروازې په ځان بندې کړې. په جرمني کې زيات شمېر افغانان د نورو هېوادونو د پناه اخيستونکو په څېر اوسېږي ؛ خو د مخه چې کوم افغانان جرمني ته تللي دي هغوی د جرمني د قانونو او اصولو په درناوي قانع دي او د هغه هېواد د کلتور درناوی کوي.
د جرمني هېواد به په تېرو اونيو کې د روځې ۶۰پناه غوښتونکي له خپله هېواده ايستل ؛خو په روانه اونۍ کې يې د ورځې ۲۰۰ تنوته د ايستونکو شمېر لوړ کړ. په دې ايستونکو پناه غوښتونکو کې هغه افغانان هم شامل دي ، چې يا خو غواړي چي په جرمني کې پناه واخلي او يا د څه مودې تېرولو وروسته له جرمني څخه نورو هېوادونو ته لاړ شي، چې د جرمني هېواد يې د دې هيلو پوره کېدو ته وخت نه ورکوي او له هېواده يې باسي . په افغانستان کې د افغانانو لپاره په خپله خاوره او خپل کورکې ژوند کول ځکه ستونزمن شوي دي ، چې د يوې خوا نا امني او د بلې خوا بې روزګاري دومره زياته شوې چې نور ځوان نسل له افغانستانه په بشپړه توګه د وتلو په حال کې دی.
د بې روزګارۍ ترڅنګ يوه بله ستونزه ، چې افغانان ولس ورسره مخ شوی موجوده اداره چې د سر نه ترپښو پورې په فساد کې ککړه ده. د ولس او په ځانګړې توګه د روزګار د له منځه وړلو زمينه برابره وي ، پر ځای د دې چې ولس ته روزګار برابر کړي ؛ نو ر يې هم د ژوند څخه لاس په سر کوي. څو مياشتې د مخه اشرف غني د کرېډت کارتونو څخه د ماليې ګرځولو فرمان صادر کړ ، چې د ولسي جرګې لخوا رد کړل شو ؛ خو تېره ورځ يې بيا دا فرمان ولسي جرګې ته وړاندې کړل شو، دا فرمان د يو څخه لږ اختلاف سره ولسي او د مشرانو جرګې دواړو تصويب کړ . ورسره د موټرو او لاريو د حق العبور ورکړه هم دوه چنده شوه ، چې په فساد کې ککړه اداره خپله بوديجه کې د ولس څخه پوره کوي.
له يوې خو ا د بې روزګارۍ څخه بهرته تللي افغانان بيا راشړل کېږي او د بلې خوا په هېواد کې ميشتو افغانانو ته دا ډول ستونزې راولاړېږي ، چې د کرېډت کارتونه دې له ولسه ګټه وکړي ، کيدای شي په هېواد کې پاتې ځوان نسل که جرمني ته لاړ نشي ؛ نورو هېوادونو ته به مخه کړي.
