کابل ټکی کام( یکشنبه، ۲چنګاش، ۱۳۹۸)
د طالبانو ویاند ذبیح الله مجاهد هم په قطر کې د امریکایانو سره د اووم پړاو خبرو د پیل نیټه اعلان کړه.
د طالبانو ویاند ذبیح الله مجاهد په خپل ټویټر لیکلي چې د روان میلادي کال د جون میاشتې په ۲۹ مه نیټه به له امریکایانو سره خبرې پیل شي.
مجاهد په خپل ټویټر وروسته له هغه دا وضاحتي ټویټ لیکلی چې تیره شپه د امریکا د مرکچي پلاوي مشر زلمي خلیلزاد هم په خپل ټویټر د خبرو د پیل نیټه همدا ورځ اعلان کړې وه.
خلیلزاد زیاته کړې وه، خپلو سفرونو دې نتیجې رسولی چې ټول اړخونه چټک پرمختګ غواړي.
د طالبانو او امریکایانو اووم پړاو خبرې په داسې حال کې پیلیږي چې تازه طالبانو چین او ایران ته سیاسي سفرونه کړي دي.
طالبانو ویلي چې چین ته د دوی سفر خورا مهم او ارزښتناک وو.
ویل کیږي اووم راونډ خبرې به مهمې وي او دواړه خواوې به په یوه ګډه هوکړه موافقه اعلانوي.
