کابل ټکی کام( چهارشنبه، ۵ چنګاش، ۱۳۹۸)
تیره ورځ د بغلان په مرکز کې ۲۵ تنه افغان سرتیرو وسلې پر ځمکه ایښي او له طالبانو سره یوځای شوي دي.
دولتي سرچینو تر اوسه د دې راپور په اړه څه نه دي ویلي، افغان حکومت ډیری وخت داسې خبرونه د نورو سرتیرو د روحیې د ساتلو لپاره نه تائیدوي او یا یې هم پټ ساتي.
د طالبانو ویاند ذبیح الله مجاهد بیا مني چې د اردو له لیکو څخه دوی ته ۲۵ تنه سرتیري ورغلي او خپلې دندې یې پریښي دي.
طالب ویاند مجاهد په خپل ټویټر لیکلي: “د بغلان ولایت مرکزي بغلان ولسوالۍ کې د کابل ادارې ۲۵ عسکر د حقائقو په درک کولو سره له خپلو دندو لاس په سر او مجاهدینو ته راغلل.د جلب و جذب مسئولینو یې هرکلی وکړ او خپل ژوند ته یې سوق کړل.”
مجاهد په خپل ټویټر له دوی سره د یو ځای شویو کسانو نومونه هم لیکلي دي.
نومونه یې په لاندې ډول دي: خیرالله، عبدلمطلب، محمدشریف، امیررسول، حمیدالله، نورحبیب، فضل ربی، عبدالصبور، عبدالرحیم، میرسلیم شاه، سیدرحمان، ګل احمد، ګلبدین، اسماعیل، فریدالله، سیف الله، خان محمد، عبدالولی، جمعه دین، علی محمد، رازمحمد، عبدالغفور، احمدیوسف، صالح محمد او عبدالقدیر.
د یادونې وړ ده چې ډیری وخت د افغان حکومت په لیکو کې ولاړ کسان له طالبانو سره یوځای کیږي خو افغان حکومت نه دی توانیدلی چې د دې کار مخه ونیسي.
طالبان د دې لپاره خپل ځانکړی کمیسیون د جلب او جذب په نوم لري چې هغوی ته دنده سپارل شوي ترڅو د افغان حکومت په لیکو کې ولاړ کسان راجلب او راوباسي.
