(کابل ټکی کام، ۱۳۹۸، چنګاښ ۱۱)
د افغانستان لپاره د امريکا د بهرنيو چارو وزارت ځانګړی استازی زلمي خليلزاد په يوه ټويټ کې ويلي، چې د روانې جولای مياشتې په اوومه او اتمه نيټه به بين الأفغاني کنفرانس جوړ شي.
خلیلزاد زياته کړې، دغه کنفرانس به د قطر او جرمني په کوربتوب د قطر په مرکز دوحه کې جوړيږي.
دغه راز د افغانستان او پاکستان لپاره د جرمني ځانګړي استازي مارکس پوټزل هم په يوه اعلاميه کې د یاد کنفرانس د جوړيدو خبر ورکړی دی.
د افغانستان د بهرنيو چارو وزارت ویاند صبغت الله احمدي څو ورځې مخکې ويلي و چې المان حکومت د طالبانو او افغان حکومت تر منځ د مذاکراتو زمينه برابروي او راتلونکو دوه اوونيو کې به دغه خبرې ترسره شي.
باوري سرچينې وايي، ښايي د قطر په راتلونکي بين الأفغاني کنفرانس کې ځينې حکومتي چارواکي هم ګډون وکړي خو دوی به د افغان حکومت استازيتوب نه کوي.
پرون د دوشنبې په ورځ په قطر کې د طالبانو د سياسي دفتر وياند سهيل شاهين په یوه ټويټ کې وويل: : ”کله چې د نړیوالو شاهدانو په حضور کې د بهرنیو ځواکونو د وتلو مهالوېش اعلان شي بیا به له افغاني لورو سره خبرې پیل شي خو د کابل له ادارې سره به د حکومت په توګه خبرې نه کېږي. ”
د تيرې جمعې په ورځ د طالبانو او امريکا تر منځ اووم پړاو مذاکرات پيل شول او ټاکل شوې وه چې دوشنبه پای ته ورسيږي او په اخره کې یو پريکړه لیک اعلان شي خو دا چې خبرې ډيرې مهم پړاو ته رسيدلي نو له همدې کبله نن دوشنبه هم د دواړو غاړو تر منځ خبرې روانې دي.
تر دې مخکې ځينو باوري سرچينو خبر ورکړی و چې د طالبانو او امريکا تر منځ په روانو خبرو کې د تروريزم پر تعريف او له افغانستانه د ټولو بهرنيو ځواکونو په وتلو هوکړه کړې.
