(کابل ټکی کام، ۱۳۹۸، چنګاښ ۱۲)
طالبانو د بغلان مرکز مربوط په چشمه شير سيمه کې د دولتي ځواکونو پر پوستو بريدونه کړي چې د لویې لارې د قومندان په شمول لس عسکر وژل شوي او یو شمير نور ټپيان دي.
یوې امنیتي سرچينې سلام وطندار ته ويلي، د طالبانو په بريد کې د لويې لارې قومندان له اووه تنو عسکرو سره وژل شوی او اوولس تنه نور ټپيان دي.
طالب وياند په خپله رسمي ټويټرپاڼه ليکي: د بغلان ولایت پلخمري ښار څلورمې حوزې اړوند چشمه شیر سیمه کې د مزدور دښمن۲ پوستې فتحه شوې. همداډول د کومکي دښمن ۵ ټانګونه ویجاړ، د لویي لارې د قومندان(فهیم اندرابي)په شمول ۱۰ عسکر قتل، ۱۸ تنه نور ټپیان شوي دي. په نښتو کې یو مجاهد په شهادت رسیدلی.
دغه راز د مرکزي بغلان ولسوالۍ اړوند په جنګل باغ او جرخشک سيمه کې هم طالبانو د دولتي عسکرو پر قطار بريدونه کړي چې په وينا يې د کنډک مرستيال قومندان بابازي په شمول اووه پوليس وژل شوی، څلور نور ټپيان او درې ټانګونه يې تخريب شوي دي.
په عين حال کې د بغلان د ولايتي شورا غړی صفدر محسني وايي، د طالبانو په بريد کې د عامه نظم د درېيمې لواء د څلورم کنډک رئيس ارکان عبدالرزاق هم وژل شوی دی.
د بغلان د پوليسو ویاند احمد جاويد بشارت هم تاييدوي چې د بغلان او کندز پر لاره طالبانو بريدونه کړي خو د تلفاتو په اړه يې له معلوماتو ورکولو ډډه کړې.
په ورته وخت کې د دوشي ولسوال صاحب داد غفوري وايي، له تيرو دو ورځو راهيسې د یادې ولسوالۍ د کيهان سيمه د طالبانو لاسته لويدلې او دولتي ځواکونه نه دي توانيدلي چې بيرته يې ونيسي.
د دوشي ولسوال وايي، که دولت په دې اړه پاملرنه ونه کړي نو په دوشي او تاله و برفک کې به له دې هم حالات بدتر شي.
