رواپورتاژ: عبدالرحمن
د تيرې جمعې په ورځ د قطر په مرکز دوحه کې د امریکا او طالبانو تر منځ د اووم پړاو خبرې پيل شوي چې نن پنج شنبه د شپږې ورځې لپاره هم روانې دي.
دا چې دا خبرې ولې وځنډيدې ايا پرمختګ لري که نه په درې راپور کې به يې ولولئ.
په قطر کې د طالبانو د سياسي دفتر ویاند او امريکا سره په خبرو کې طالب استازي وايي، چې په خبرو کې پرمختګونه شوي او پر ځينو مسائلو موافقې ته رسيدلي دي.
په قطر کې د اووم پړاو خبرې د درې ورځو لپاره پلان شوې وې خو پر ځينو مسائلو د توافق لپاره دغه خبرې نن شپږمې ورځې ته وغځيدې.
که څه هم تر اوسه د خبرو جزيات نه دي په ډاګه شوي خو په قطر کې باوري سرچينې وايي، ځکه خبرې اوږدې شوې چې د بهرنيو ځواکونو د مهالويش پر تفصيل او د حکومت او طالبانو تر منځ د باور جوړونې په اړه بحثونه روان دي.
ويل کيږي، طالبان له امریکايانو غواړي چې په شپږ مياشتو کې د ټولو بهرنيو ايستل اعلان کړي.
په قطر کې د طالبانو د دفتر ویاند سهيل شاهين وايي، په خبرو کې هيڅ اختلاف یا خنډ نه دی پيدا شوی زياتوي: “خبرې نهایي نه شوې خبرو دوام وکړ، داسې نه ده چې اختلافونه موجود و یا موږ له کوم خنډ سره مخ و داسې کوم څه نه و. خو رښتیا هم خبرې اوږدې شوي”.
نوموړی زياتوي، په اووم پړاو خبرو کې له اتيا تر نوي سلنه پرمختګ شوی او نن پنج شنبه به هم دغه بحثونه دوام وکړي.
په عين حال کې د طالبانو د مرکچي پلاوي غړي ملا خيرالله خيرخواه هم په دغه خبرو کې د پرمختګ خبر ورکړی زياتوي:”امریکایانو زموږ د تشویشونو د لرې کولو کوښښ کړی او موږ هم د دوی د تشویشونو د لرې کولو هڅه کړې ده. تر دې دمه مذاکراتو کې له سختو پړاوونو تېر شوي یو”.
له بله پلوه د واشنګټن پوسټ ورځپاڼې هم د قطر خبرو کې د نږدې سرچينو له قوله ليکي، چې دا مهال امريکا او طالبان له افغانستانه د ټولو بهرنيو ځواکونو د وتلو د مهالويش پر سر د یوه توافق پر ليکلو بحثونه کوي.
د سرچينې په وينا، په دغه توافق کې د بهرنيو د وتلو پر مهالويش او د ترهګرۍ پرضد مبارزې موارد موجود چې پر توافق ليکل پیل شوي خو پر اختلافي مواردو بحث روان دی.
ويل کيږي، طالبان چې امریکا غوښتنه کوي چې له طالبانو ډير وخت واخلي څو افغانستان پرېږدي خو طالبان بيا وايي، چې ژر بايد ټول بهرني ځواکونه ووځي.
هڅه روانه ده، چې په دوحه کې د بين الأفغاني غونډې مخکې امریکا او طالبان یوې هوکړې ته ورسيږي.
په دغه خبرو کې د امريکايي پلاوي مشري زلمی خليلزاد کوي او د طالبانو مشري د شېر محمد عباس ستانکزي پر غاړه ده.
