(کابل ټکی کام، ۱۳۹۸، چنګاښ ۱۴)
د فارياب ولايت په خواجه سبزپوش ولسوالۍ کې پر یوه بازار د ملي اردو عسکرو د هاوان مرمۍ لګيدلې چې د چارواکو په وينا څلوېښت کسانو ته يې مرګ ژوبله اړولې ده.
د خواجه سبزپوش ولسوال عبدالله معصومي وايي، پېښه نن سهار د يادې ولسوالۍ په جمعه بازار کې رامنځته شوې او مرمۍ په بازار کې د خلکو د ګڼې ګوڼې په منځ کې لګيدلې ده.
د معصومي په وينا، په پېښه کې نهه کسان وژل شوي او اته ويشت تنه نور ټپيان دي.
په عين حال کې د عامې روغتيا مشر ډاکټر محمد نعيم وايي، چې څلور جسدونه او اته ويشت ټپيان د ميمنې روغتون ته وروړل شوي چې ښځې او ماشومان هم پکې شامل دي چې د ځينو يې روغتيايي وضعيت د اندېښنې وړ دی.
د جمعه بازار اوسيدونکي وايي، لومړی طالبانو د ملي اردو مرکز ته نږدې پر یوه عسکر بريد وکړ چې وروسته د ملي اردو ځواکونو له خوا پر بازار د هاوان مرمۍ وار شوه او یاده مرګ ژوبله يې واړوله.
دا لومړی ځل نه دی چې د ملي اردو هاوان مرمۍ لګيدو له کبله ملکي خلکو ته مرګ ژوبله اوړي بلکې تر دې مخکې هم ورته ډول پيښې شوي او د دولتي ځواکونو د هاوان او توپونو په ډزو کلي او ملکي خلک په نښه شوي دي.
