(کابل ټکی کام، ۱۳۹۸، چنګاښ ۱۵)
د غزني ولايت په مرکز کې په یوه مسجد کې د چاودنې له امله درويشت کسانو ته مرګ ژوبله اوښتې ده.
د غزني د والي وياند عارف نوري وايي، پېښه پرون د جمعې په ورخ د ښار مربوط د خاک غريبان سيمې په محمديه مسجد کې رامنځته شوې ده.
د نوري په وينا، په مسجد کې چاوديدونکي توکي ځای پر ځای شوي و او د جماعت پر مهال يې چاودنه کړې ده.
نوموړی وايي، د پيښې قربانيان ټول ملکيان دي چې د نهه کسانو روغتيايي وضعيت ښه نه و او د تداوۍ لپاره کابل ته لېږدول شوي دي.
ځايي اوسيدونکي وايي، په چاودنه کې يوويشت کسان ټپيان شوي دي او دوه تنه نور وژل شوي دي.
د غزني د روغتون مشر بازمحمد همت وايي، د پيښې له ځایه د ماشومانو په شمول شل کسان روغتون ته د تداوۍ لپاره وروړل شوي دي.
تر اوسه معلومه نه ده چې دغه چاودنې د چا له خوا تر سره شوې او پړه يې هم چا په غاړه نه ده اخيستې.
تر دې مخکې هم د هيواد په بيلابيلو سيمو کې په مسجدونو کې چاودنې شوي، ديني علماء او د مدرسو استادان په نښه شوي چې مسؤوليت چا نه دی منلی.
ويل کيږي، ډيری ورته ډول پيښې د ځانګړو استخباراتي کړيو له خوا د بيلابيلو موخو په موخه ترسره کيږي.
