کابل ټکی کام( شنبه، ۱۵چنګاش، ۱۳۹۸)
قطر دوحه کې د تیرو اوو ورځو راهیسي طالب او امریکایي استازي د افغانستان د مسئلې په سیاسي حل خبرې سره کوي.
دا پړاو چې ډیر مهم او حساس بلل کیږي، د یوې ورځنۍ وقفې وروسته نن (شنبه) بیا پیلیږي.
د جمعې په شپه ناوخته په قطر کې د طالبانو ویاند سهیل شاهین په خپل ټویټر ولیکل چې سبا جمعه به خبرې رخصت وي او د شنبې په ورځ به بیا پیل شي.
ویل کیږي چې نن به د اووم پړاو خبرو وروستۍ ورځ وي ځکه چې سبا د قطر او جرمني په کوربتوب په دوحه کې د بین الافغاني کنفرانس لومړۍ ورځ ده.
د طالبانو او امریکایانو په اووم پړاو خبرو کې دواړه لوري د زیات پرمختګ خبر ورکوي خو مشخص کوم ټکي نه په ګوته کوي چې په کومو مسائلو پرمختګ راغلی دی.
د طالبانو د مرکچي پلاوي یو غړي مولوي محمد نبي عمري ویلي چې مشکل د بهرنیو ځواکونو د وتلو په مهالویش کې دی.
په عموم کې دا خبرې داسې ښکاري چې په زیاتو شیانو توافق راغلی او لکه څنګه چې طالبان هم وایي چې اتیا او ۹۰سلنه پرمختګ راغلی دی.
د دې پړاو د پیل په وخت کې ویل کیدل چې د خبرو له پای ته رسیدو سره سم به دواړه لوري یوه ګډه اعلامیه هم خپره کړي خو اوس ویل کیږي چې دا اعلامیه به خپره نه شي.
