پوهنې وزارت: په رسمي غونډو کې د ښوونځيو ماشومان هرکلي ته ودرول ممنوع اعلان کړل
(کابل ټکی کام، ۱۳۹۸، چنګاښ ۳۱)
د افغانستان د پوهنې وزارت ويانده نوريه نزهت وايي، چې له دې وروسته هيڅ دولت چارواکی حق نه لري چې په رسمي غونډو کې د ښوونځيو ماشومانو د هرکلي مراسمو کې ښه راغلاست ته ودروي.
د نزهت په وينا، د چارواکو د هرکلي مراسمو کې، په ټاکنيزو کمپاينونو، لاريونو او اعتراضيه غونډو کې د ښوونځيو ماشومانو ګډون ممنوع اعلان شوی دی.
نوموړې زياتوي، په ورته ډول غونډو کې د ګډون له کبله د ښوونځيو ماشومانو ته امنيتي ستونزې پيدا کيږي او له خپلو درسونو ووځي.
د نزهت په خبره له هغه کسانو سره به قانوني چلند وشي که څوک د دغه امر مخالفت وکړي.
تر دې مخکې په ډيری غونډو کې لوړپوړو حکومتي چارواکو او ولسمشرانو ته هم د ښه راغلاست مراسمو کې دښوونځي شاګردان ودرول شوي دي.
که څه هم د پوهنې وزارت یاد اعلان کړی خو تر دې مخکې هم حکومتونو د یاد عمل د پلي کولو امرونه صادر کړي خو بيا يې پلي کړي دي.
