غورځنګ
له څو ورځو راهيسې په ځينو غرب پلوه رسینو کې اوازې خپرې دي چې ګواکې طالبان په افغانستان کې له امریکايانو سره د دوی د اډو پر سر هوکړې ته نږدې شوي دي يعنې طالبان په افغانستان کې امریکايانو ته اډې ورکوي.
اول خو دا چې د امريکايانو د يرغل له پيل څخه راپدې خوا چې تقريباً نولس يا اتلس کاله پوره کېږي، طالبان او امريکايان په جګړه بوخت دي، امريکايان غواړي چې په افغانستان کې دې د دوی د خوښې ډيموکراتيک نظام حاکم وي او د دوی دائمي نظامي حضور دې وي. خو برعکس طالبان غواړي چې په افغانستان او ان په اسلامي نړۍ کې د امريکايانو حضور ته د پای ټکی کېږدي او د زور او يا هم د سولې او مذاکراتو له لارې طالبان هڅه کوي او تر ټولو زیات کوشش کوي چې په افغانستان کې د امريکايانو نظامي حضور ختم کړي او يو شرعي او اسلامي نظام منځته راولي تر څو افغانان په امن او ازادۍ کې ژوند تېر کړي.
له دې مخکې چې کله طالبانو په افغانستان کې اسلامي نظام قائم کړی وو، په هغه وخت کې هم داسې څوک نشي ښودلی چې ګواکې طالبانو دې په کومه نقطه کې له خپل ګران هېواد سره جفا کړې وي. او يا دې هم د هېواد يوه لوېشت خاوره دې په چا پلورلې وي او يا دې هم په هېواد کې د بل چا ګټې خوندي کړې وي. خو برعکس طالبانو د خپلو بې ساري قربانيو په بدله کې افغانانو ته سوکالي راوړه او خپل هغه هدف ته يې ورسول د کوم لپاره چې افغانانو د روسانو په مقابل کې يو نيم ميليون شهيدان او تقريباً درې ميليونه معيوبين او نور په لسګونو زره ګاونډيو هېوادونو ته مهاجر شول.
نو په داسې حال کې به طالبان څنګه په افغانستان کې امريکايانو ته د اډو ورکول ومني؟؟
ايا هغه عقل او فکر سالم دی؟؟ په کوم کې چې دا خبره راګرځي چې ګواکې امريکايان له طالبانو څخه په افغانستان کې نظامي اډې غواړي او طالبان يې هم ورسره مني؟؟
او دا خبره چې طالبان له امريکايانو سره په افغانستان کې د دوی نظامي اډې مني؛ د طالبانو له اتلس کلنې بې ساري تاریخي قربانيو سره اړخ لګوي؟؟
ولې د طالبانو په اړه دا تصور رامنځته کېږي؟ چې د امریکايانو نظامي آډې مني؟؟
خو ښکاره خبره ده چې په افغانستان کې د امریکايانو نظامي اډې او طالبان دوه سره بلکل متضادې کليمې دي، نو په داسې حال کې به طالبان څنګه دغه د شر او فساد مور (امریکايي اډې) ومني؟؟
په پای کې بايد ووايو چې د طالبانو په اړه دغه ډول خبرې په هغه سوچ او ذهن کې راپيداکېږي کوم فکر چې د ازادۍ احساس نه لري او نه هم د ازادۍ او خپلواکۍ مفهوم پېژني، بلکې يوازې او يوازې په ډيموکراټيکو اصولو باور لري او ډيموکراسي ورته د انساني ژوندون د پرمختګ او لوړاوي قانون ښکاري.
