کابل ټکی کام (دوشنبه ، ۳۱ چنګاښ ، ۱۳۹۸ل)
د امریکا ولسمشر ډونلډ ټرمپ نن دوشنبه د جولای پر ۲۲مه نېټه واشنګټن کې د پاکستان له لومړي وزیر عمران خان سره وکتل.
په دې کتنه کې دواړو مشرانو د افغانستان پر روان سیاسي او امنیتي وضعیت هم خبرې کړې دي.
ولسمشر ډونالډ ټرمپ ویلي، له پاکستان سره په سلا مشوره اوددې هېواد په مرسته به امریکا خپل ځواکونه له افغانستانه وباسي.
دنوموړي په ځواب کې د پاکستان لومړي وزیر عمران خان وویل، حکومت یې په افغانستان کې د سولې او ثبات لپاره د امریکا د هلو ځلو بشپړ ملاتړ کوي.
واشنګټن ته د پاکستان د لومړي وزیر عمران لومړی رسمي سفر دی چې له ولسمشر ټرمپ سره لیدنه کوي.
واشنګتن ته د نوموړي تر رسېدو وړاندې هم اټکل و چې د دواړو مشرانو په کتنه کې به پر افغانستان خبرې کېږي، او دروانو سولییزو هڅو دکامیابۍ په پار به دیوبل دهمکارۍ ژمنې تازه کوي.
په لومړیو کې داسې تمه کېدله چې د امریکا ولسمشر به په دې کتنه کې له پاکستانه په زغرده وغواړي چې د افغان سولې په بهیر کې پوره مرسته وکړي خو دټرمپ له څرګندونو ښکاري چې نوموړی له افغانستانه دخپلو ځواکونو دوتلو بیړه لري.
دټرمپ او عمران ناسته لاهم روانه ده، دا لامالومه نه ده چې دوی به په دې لیدنه کې په نورو کومو موضوعاتو بحث وکړي.
