کابل ټکی کام (پنجشنبه ، ۳ زمری ، ۱۳۹۸ل)
ایرانۍ رسنۍ وایي چې ددې هېواد ولسمشر حسن روحاني دواشنګټن سره په مشروط ډؤل دخبرو کولو چمتوالی ښودلی.
حسن روحاني ویلي، که چېرته امریکا ورباندې لګول شوي بندیزونه لري کړي نو ورسره خبرو ته چمتودی.
نوموړي ویلي، امریکا هڅه کوي د ایران او ځینې نورو هېوادونو ترمنځ ستونزې جوړې کړي، خو دوی به هیڅکله د امریکا په لمسون چا سره کړکېچ ته داخل نه شي.
هغه دغه راز زیاته کړې، له بریتانیا سره د تېل وړونکو کښتیو مبادلې ته او پر خپل اټومي پرواګرام له امریکا سره غیر رسمي خبرو ته په مشروط ډول تیار دي.
روحاني زیاتوي، هېواد یې له یو شمېر اروپایي هېوادونو سره د اړیکو د ترینګلتیا په هڅه کې نه دی او که دا هېوادونه د ده په خبره له خپلو ایران ضد اقداماتو لاس په سر نه شي؛ نو د ایران له لوري به هم مناسب ځواب تر لاسه کړي.
ایران دا څرګندونې په داسې حال کې کوي چې له امریکا وروسته ددې هېواد او ځینې اروپایي هېوادونو ترمنځ یوشمېر کړکېچونه رامنځته شوي.
