حوثیانو ادعا کړې چې د سعودي په یو هوایي ډګر یې برید کړی
کابل ټکی کام( پنجشنبه، ۳زمری، ۱۳۹۸)
حوثیانو ادعا کړې چې د سعودي په خمیس مشیط ښار کې یې په مشهوره “شاه خالد” هوایي اډه باندې برید کړی دی.
د حوثیانو یوه ویاند رسنیو ته ویلي چې دا بریدونه د هغو ۲۱بریدونو ځواب وو چې سعودي عربستان د ۱۲ساعتو په اوږدو کې په دوی ترسره کړل.
د ده په وینا چې شاه خالد هوایي ډګر یې د ډرون الوتکې په توسط تر هدف لاندې نیولی دی.
سعودي تر اوسه د حوثیانو د دې ادعا په اړه رسنیو ته څه نه دي ویلي.
تر اوسه دا هم نه ده مالومه چې د برید له امله څومره تلفات رامنځته شوي دي.
دا لومړی ځل نه دی چې حوثیان د سعودي په خاوره بریدونه کوي، بلکې څو ځل وړاندې یې هم د ډرون او توغندیزو بریدونو په واسطه درانه تلفات اړولي دي.
حوثیان په یمن کې جنګیږي او تور پرې پورې کيږي چې ایران یې تر شا ولاړ دي او د دوی په خلاف بیا د سعودي په مشرۍ یو ائیتلاف په سیمه کې په جګړه بوخت دی.
دواړه خواوې ډیری وخت یو په بل د بریدونو او د تلفاتو وراړولو ادعاوې کوي.
