کابل ټکی کام( پنجشنبه، ۳زمری، ۱۳۹۸)
لوګر کې د پاکستان په مالي مرسته له لس کلن ځنډ وروسته د یوه روغتون کار بشپړ او افتتاح یې وشوه.
د دې روغتون د جوړولو چارې لس کاله پخوا پیل شوې وې، خو د ستونزو له کبله یې په جوړیدو زیات وخت ولګید.
دا روغتون چې د “نایب امین الله” په نوم ونومول شو، تیره ورځ (د جولای په ۲۴مه) یې د پرانستي مراسم ترسره شول.
د روغتون د پرانستې په مراسمو کې د پاکستان د پارلېماني چارو وزیر شهریار اپریدي او د افغانستان د عامې روغتیا وزیر فېروزالدین فېروز په ګډون ځینو نورو چارواکو هم ګډون کړی وو.
جوړو شویو مراسمو ته شهریار افریدي په خپلو خبرو کې د پاکستان او افغانستان په اړیکو وغږید او ویې ویل چې د افغانستان په نورو برخو کې یې هم د روغتونو په جوړولو یو ارب ډالر لګولي دي.
د یادونې وړ ده چې څه وخت مخکې په کابل کې هم د محمد علي جناح په نوم یو روغتون د پاکستان په مالي مرسته پرانستل شو.
