ډاکټر يوسف اکبري
ټرمپ په خپلو څرگندولو سره واضح کړه چې جنګ اوږدولو کښې خپل شوم اهداف لري،
افغانان په دې له پخوا پوهیدل خو دا څو کاله مسلسل ځینو کړیو دا تبلیغ کولو چې د افغانسنان دیني طبقه لکه علماء، مدارس، دیني اسلامي جریانات د دې جنګ عوامل دي او دایې په افراطیت متهمول، سره له دې چې بالعموم علماوو، دیني جریاناتو او دیني خلکو کله هم له افراط نه کارنه دی اخیستی بلکې هر وخت یې معقوله او علمي خبره کړې
تشدد او افراط ته یې لمن نه ده وهلې، دلته هر وخت دیني قشر مظلوم واقع شوی
هرکله دیني قشر جنګ ته اړ ایستل شوی،او مجبور کړای شوی چې له خپل سر، مال او عزت او اسلامي ارزښتونو نه دفاع وکړي
دلته علماء بې ګناه وژل سوي، ژوندي تر خاورو لاندې شوي، محبسونه ترې ډک شوي او تبعید شوي
هر ظلم، جبر، تېری او استبداد طبعي عکس العمل لري، له دې عمله دلته عکس العمل هم لیدل شوی، خو پړه په ظالمانه عمل کونکي ده، عکس العمل طبعي دی
اوس که موږ د یو ملت په توګه ژوند کول غواړو او غواړو چې وطن مو آباد او ودان وي، باید زموږ حاکمه ډله له ظلم نه لاس واخلي، په ملت ترحم ولري، د چا حق تر پښو لاندې نکړي، هر وګړی باید خپل وطن کښې خپل سر، مال، اولاد محفوظ او ځان معزز وګڼې، تر څو داسې نه وي شوي، مشکلات به وخت په وخت مختلفو شکلونو کښې مخې ته راځي، او عملا مخې ته راغلل چې نه روسانو څه مرسته وکړی شوه نه امریکایانو
خو دلته مصیبت دادی چې د روس او امریکا غلامان ځان د خلکو د وژلو، بندې کولو، د خلکو جایدادونو او اموالو د مصادره کولو حقدار ګڼي، کله چې بل اړخ له ځان نه دفاع پیل کړي بیا ورته ویل کېږي چې دا متشدد دی افراط کوي، جنګ کوي او ترهگر دي
حاکم اړخ هر وخت ځان لپاره د خلکو وژل او ذلیله کول جایز بللي او د خپل حق نه مدافع اړخ یې په افراط او ترهگرۍ تورن کړی
اوس ټرمپ خبره څرګنده کړه چې جنګ هغو پیل کړی، بندول يې ورته هم آسانه دي خو د خپلو شومو اهدافو لپاره یې نه بندوي
نو راځۍ چې سره یو شو، دښمن وپیزنو،ا هداف یې شنډ کړو، وطن مو اباد کړو
د وطن خدمت، د وطن ابادۍ سره مینه،هلته د امن او سولې لپاره کوښښ، وطن کې د تعلیم او صحت د ودې لپاره کار، د خپلو خلکو خدمت او د سوچه آسماني نظام د حاکميت لپاره مټې راونغاړو.
